“Mülki Müqavilə” fraksiyasının deputatı Taquhi Ğazaryan Rusiya ilə problemlərin mövcudluğunu “uydurulmuş, mifoloji hekayə” hesab edir.
Vladimir Putinin Ermənistandakı seçkilərdə rusiyapərəst qüvvələrin iştirak etməsi barədə bəyanatını o, belə şərh edib:
“Rusiya Federasiyasının prezidenti məntiqi olaraq istərdi ki, Ermənistan xalqı ən rusiyapərəst namizədi seçsin ki, o, Ermənistan xalqının Rusiya orbitində və gündəmində qaldığına əmin olsun.
Lakin bu o demək deyil ki, əgər Ermənistan xalqı başqa seçim etsə, o, işləməyəcək”.
Deputatın sözlərinə görə, hakim partiya ilə “rusiyapərəst qüvvələr” adlananlar arasındakı fərq ondadır ki, maraqların toqquşması halında hakim partiya Ermənistanın maraqlarını seçir.
“Biz elə bir nöqtəyə çatırıq ki, maraqlarımız artıq üst-üstə düşmür və deyirik ki, hazırda öz marağımızı seçməliyik.
Bu rusiyapərəst adlanan qüvvələr və digərləri isə deyirlər ki, əgər bu iki maraq arasında Rusiyanınkını deyil, özümüzünkünü seçsək, Ermənistan məhv olar. Biz öz yolumuzla gedirik, fərq budur”.
Qazaryan həmçinin qeyd edib ki, hakimiyyət xarici müdaxilənin sıfır təsir göstərəcəyinə zəmanət verə bilməz, lakin onu mümkün qədər azaldır.
Misal olaraq o, gömrük orqanları tərəfindən on milyonlarla dollar nağd pulun keçirilməsi cəhdlərinin qarşısının alınmasını göstərib ki, bu da onun fikrincə, institutların işinin səmərəliliyinin artmasından xəbər verir.
