Ermənistanın Baş naziri Nikol Paşinyan, Avropa Siyasi Birliyinin 8-ci sammitinin yekunlarına dair birgə bəyanat çərçivəsində müzakirələrin əsas istiqamətlərini yekunlaşdırıb.
“Məmnuniyyətlə bildirmək istəyirəm ki, bu gün Yerevanda qitənin hər yerindən və onun hüdudlarından kənarda olan liderləri bir araya gətirən Avropa Siyasi Birliyinin 8-ci sammiti uğurla başa çatdı” – deyə görə Baş nazir bildirib.
O, Avropa Birliyinə və tərəfdaşlarına konfransın təşkili üçün təşəkkür edib.
“Bu fürsətdən istifadə edərək, sammitin birgə təşkilində sıx əməkdaşlığa və tərəfdaşlığa görə Avropa Birliyinə, habelə bu formatın coğrafiyasını genişləndirdiklərinə görə qitədən kənar tərəfdaşlarımıza səmimi minnətdarlığımı bildirmək istərdim” – deyə o, qeyd edib.
Paşinyan regional proseslərə də toxunub: “Sülh prosesi və regional əməkdaşlıq kontekstində Azərbaycan Prezidentinin məsafədən (onlayn) iştirakını və Türkiyə Vitse-prezidentinin iştirakını vurğulamaq istəyirəm”.
Onun sözlərinə görə, müzakirələr dialoqun zəruriliyini təsdiqləyib.
“Bugünkü müzakirələr təsdiqlədi ki, dünyada artan çağırışlar şəraitində bütün regionlarda sülh və sabitliyin möhkəmləndirilməsi üçün səmimi dialoqa və praktiki qərarlara ehtiyac var” – deyə o bildirib.
Əlavə edib ki, diqqət mərkəzində təhlükəsizlik, qarşılıqlı bağlılıq, regional əməkdaşlıq, iqtisadi sabitlik, energetika və yaşıl enerjiyə keçid məsələləri olub.
Baş nazir qarşılıqlı bağlılığın əhəmiyyətini xüsusi vurğulayıb:
“Qarşılıqlı bağlılıq qitədə iqtisadi təhlükəsizlik, sabitlik və uzunmüddətli dayanıqlılıq üçün mərkəzi əhəmiyyət kəsb edir”.
O, qeyd edib ki, iqlim və enerji hədəflərinin irəlilədilməsi kontekstində əlaqələrin gücləndirilməsi ümumi önəmlik kimi qəbul edilib.
Cənubi Qafqaza toxunan Paşinyan qeyd edib ki, bu kontekstdə regionda sülh və sabitliyin təşviq edilməsinin vacibliyi də müzakirə olunub:
“Davamlı sülh, münasibətlərin normallaşması və sərhədlərin açılması təkcə regiona fayda verməyəcək, həm də daha geniş Avropa məkanında və onun hüdudlarından kənarda əlaqələri və əməkdaşlığı gücləndirəcək”.
O, həmçinin hibrid təhdidlər mövzusunun da müzakirə edildiyini əlavə edib:
“Bu gün biz həmçinin demokratik ölkələrin hibrid təhdidlərlə necə mübarizə aparmalı olduğunu müzakirə etdik”.
Paşinyanın sözlərinə görə, Ermənistan regionda öz təşəbbüslərini davam etdirəcək: “Ermənistan inklüziv əlaqələrin genişləndirilməsinə və daha geniş regionda sabitliyin möhkəmləndirilməsinə yönəlmiş təşəbbüsləri irəli sürməyə davam edir”.
Baş nazir sammitin bu formatın əhəmiyyətini yenidən təsdiqlədiyini bildirib:
“Sammit təsdiq etdi ki, Avropa Siyasi Birliyi təkcə dialoq formatı deyil, həm də etimadın möhkəmləndirilməsi və həmfikir tərəfdaşlarla daha koordinasiyalı və uzaqgörən Avropa gündəliyinin formalaşdırılması üçün bir platformadır”.
Paşinyan Yerevanda aparılan müzakirələrin davamlı təsiri olacağına əminliyini ifadə edib. Çıxışının sonunda o, növbəti sammitə ev sahibliyi edəcək İrlandiyanın Baş nazirinə uğurlar arzulayıb:
“Fürsətdən istifadə edərək, əziz dostum, İrlandiyanın Baş naziri Martinə bu güclü sürəti və sinerjini qoruyub saxlamaq işində uğurlar arzulayıram”.
