Mayın 19-23-də Ermənistanda “Concours Mondial de Bruxelles 2026” beynəlxalq şərab dequstasiyası müsabiqəsi keçiriləcək
“Concours Mondial de Bruxelles 2026” beynəlxalq şərab müsabiqəsinin Ermənistan Respublikasında keçirilməsi üzrə tədbirlər proqramının icrasını təmin etmək məqsədilə hökumət qərar qəbul edib.
Buna əsasən, 2026-cı il üçün zəruri olan 684 milyon dram məbləğində vəsaitin İqtisadiyyat nazirliyinin 2026-cı il dövlət büdcəsindən yenidən bölüşdürülərək Ermənistan Üzümçülük və Şərabçılıq Fonduna ayrılması nəzərdə tutulur.
İqtisadiyyat naziri Gevorq Papoyan qeyd edib ki, bu, formatına görə unikal, dünyanın ən böyük və nüfuzlu müsabiqəsi hesab olunur və 30 illik təcrübəyə malikdir.
Müsabiqə regionda ilk dəfə təşkil olunur; əvvəllər Portuqaliya, İtaliya, İspaniya, Meksika, Çin və digər ölkələrdə keçirilib.
Nazir məlumat verib ki, müsabiqə may ayının 19-dan 23-dək baş tutacaq. Üçgünlük müsabiqə Karen Dəmirçiyan adına İdman-Konsert Kompleksində təşkil olunacaq.
Tədbirdə 65 ölkədən təxminən 400 şərab eksperti, o cümlədən 120 alıcı, 200 jurnalist, bloggerlər, somelyelər və yüksək reytinqli mütəxəssislər iştirak edərək 60-dan çox ölkənin 8000-ə yaxın şərab növünü qiymətləndirəcəklər.
Tədbir çərçivəsində alıcılar, satıcılar və erməni şərab istehsalçıları arasında biznes görüşləri keçiriləcək. Şərabçılıq bölgələrinə, zavodlara və tarixi-mədəni məkanlara səfərlər təşkil olunacaq.
Bu səfərlər ənənəvi mətbəx, milli musiqi və xalq şənliklərini əks etdirən mədəni proqramlarla müşayiət olunacaq.
Həmçinin, Ermənistan haqqında beynəlxalq nüfuzlu media platformalarında geniş məqalə və reportajların dərci məqsədilə 30-a yaxın jurnalist üçün media turlar təşkil ediləcək.
