Britaniya hökuməti dünən bir sıra Rusiya təşkilatlarına və təxminən əlliyə yaxın rusiyalıya qarşı sanksiyalar tətbiq edəcəyini açıqlayıb. Rəsmi London onları “Ukraynada demokratiyanı zəiflətməkdə, eləcə də Ermənistan seçkilərinə müdaxilə cəhdlərində” ittiham edir.
Britaniya hökumətinin məlumatına görə, sanksiyaların hədəfində olan təşkilatlardan biri olan Moskvada yerləşən Sosial Planlaşdırma Agentliyi “Ermənistanda Rusiyayönlü təşkilatlar yaratmaq və hökuməti Rusiyayönlü şəxslərin xeyrinə devirmək məqsədi daşıyan kampaniyalar planlaşdırırdı”, – “Azatutyun” xəbər verir.
Britaniya hökumətinin məlumatına görə, London sanksiyaları altında olan digər bir Rusiya təşkilatı olan ANO Dialog təşkilatı “Ermənistanın daxili siyasətinə müdaxilə planlarını Rusiya kəşfiyyatı ilə əlaqələndirib”.
Rusiyanın Londondakı səfirliyi artıq Britaniya hökumətinin açıqlamasına cavab olaraq onu “absurd” adlandırıb.
Rusiyanın Böyük Britaniyadakı səfirliyi bildirib ki, “Kiyevdə artıq dövlət çevrilişinə səbəb olan Londonun neokolonial siyasəti indi Ermənistanı hədəfə alıb. Qərb özü bu yaxınlarda Moldova və Rumıniyada olduğu kimi suveren dövlətlərin işlərinə müdaxiləni dayandırmalıdır. Oğru ilk olaraq “oğrunu tutun” deyə qışqırır”.
