Yerevanda Moldova və Gürcüstanda AB-nin viza rejiminin liberallaşdırılması proqramının icrasının tədqiqatının təqdimatı keçirilib.
“Policy and Management Consultancy” (PMCG) şirkəti bu ölkələrin öz sistemlərini AB-nin viza azadlığı üzrə Fəaliyyət Planına necə uyğunlaşdırdıqlarını təqdim edib.
Moldova və Gürcüstanda AB-nin viza rejiminin liberallaşdırılması proqramının icrasının tədqiqatının müzakirəsində Ermənistanın müxtəlif idarələrinin və vətəndaş cəmiyyətinin nümayəndələri iştirak edirdilər.
Müzakirənin əvvəlində “Konrad Adenauer” Fondunun “Cənubi Qafqazda Siyasi Dialoq” regional proqramının rəhbəri Yakob Vollenşteyn qeyd etdi ki, Ermənistanın AB-nə yaxınlaşması da konkret addımlar tələb edir.
“Hesab edirəm ki, bir neçə il ərzində Ermənistan üçün viza rejiminin liberallaşdırılmasına nail olacağıq. Və bəli, ümid edirəm ki, bu, Ermənistanın Avrasiya İqtisadi İttifaqına üzvlüyünə zidd olmayacaq. Axı, lap bu yaxınlarda cənab Putin ziddiyyətlər səbəbindən mümkün ‘boşanma’ haqqında bəyanat verdi”.
Təqdimatın özünə toxunan Yakob Vollenşteyn etiraf etdi ki, Gürcüstan və Moldovanın bu məsələdə böyük təcrübəsi var.
Proqram rəhbərinin sözlərinə görə, həmin ölkələrin hər birinin öz yolu olsa da, onların təcrübəsi Ermənistana bu yolu daha hamar keçməyə kömək edə bilər.
Vollenşteyn həmçinin vurğuladı ki, AB-nin viza rejiminin liberallaşdırılması təkcə səyahətlərə aid deyil, həm də qanunvericiliyin harmonizasiyasına aiddir.
“Hamımız başa düşürük ki, Ermənistan hazırda atəş altındadır. Bəzi ölkələr onun avropa yolu ilə getməsini istəmir.
Biz bunu iyunun 7-də ölkədə keçiriləcək parlament seçkiləri və onlara hibrid təhdidlərlə təsir etməyə cəhd edilməsi fonunda da görürük”.
Tədqiqatı həyata keçirən PMCG şirkətinin nümayəndəsi, Gürcüstanın daxili işlər nazirinin keçmiş müavini Şalva Xutsisvili müzakirə iştirakçılarına işlərinin əsl məqsədi haqqında danışdı.
O, əmin etdi ki, onların tədqiqatının məqsədi Gürcüstan və Moldova nümunəsində erməni həmkarlarına praktiki biliklər verməkdir.
“Məqsədimiz təcrübəmiz, yaranan problemləri necə aşdığımız barədə hərtərəfli məlumat təqdim etməkdir. İki ölkənin qarşılaşdığı problemləri və onların tətbiq etdiyi strategiyaları öyrənməklə, Ermənistana AB ilə əlaqələrinin gələcək inkişafı və möhkəmləndirilməsi üçün faydalı olacaq praktiki biliklər verə bilərik”.
“Konrad Adenauer” Fondunun prezidenti Aleks Aleksişvili Gürcüstan və Moldovada viza liberallaşdırılması prosesini təqdim etdi.
O qeyd etdi ki, bu proses kifayət qədər uzun olub.
“Moldova və Gürcüstanda bu proses əvvəldən axıra qədər təxminən yeddi il çəkdi.
Yeddi il kifayət qədər uzun müddətdir, elə deyilmi? Əsas məqsədimiz prosesi öyrənmək idi ki, əsas çağırışların nədən ibarət olduğunu, hansı sahələrdə işi yaxşılaşdırmaq mümkün olduğunu anlayaq və bununla da erməni tərəfi üçün prosesi mümkün qədər asanlaşdıraq və müddətləri mümkün qədər qısaldlaq. İdeya bu idi”.
Aleksişvili həmçinin Ermənistanın bu yolda ilk növbədə nəyə diqqət yetirməli olduğunu vurğuladı.
“Ermənistan artıq bütün istiqamətlər üzrə kifayət qədər yaxşı işləyir və Avropa Komissiyasının ilk monitorinq missiyası irəliləyişi qeydə alıb. İndi başqalarının təcrübəsindən istifadə edərək vaxtı mümkün qədər qısaltmaq lazımdır.
Hal-hazırda kifayət qədər böyük həvəs, səfərbərlik, öhdəlik və bağlılıq görürük. Buna görə hesab edirəm ki, Ermənistan bu yolu digər ölkələrdən qat-qat qısa müddətdə keçə bilər”.
AB ilə Ermənistan arasında viza liberallaşdırılması üzrə dialoq 2024-cü ilin sentyabrında başlayıb. 2025-ci ilin noyabrında Ermənistana bu istiqamətdə Fəaliyyət Planı təqdim edilib.
Plan 74 bənddən ibarətdir və Ermənistan bu bəndləri həyata keçirməlidir.
