Ermənistan hökuməti Ermənistan və Azərbaycan arasında dövlət sərhədinin delimitasiyası prosesinə dair 3 təlimatı təsdiqləməyi planlaşdırır. Müvafiq qərar layihəsi hüquqi aktların layihələrinin dərci üzrə vahid internet saytında ictimai müzakirəyə çıxarılıb.
Layihədə Ermənistan və Azərbaycan arasında dövlət sərhədinin delimitasiyası sənədlərinin tərtib edilməsi və dərci, delimitasiya xəritəsinin yaradılması, habelə delimitasiya zamanı ekspert qruplarının iş qaydası haqqında təlimatların təsdiqlənməsi təklif olunur.
Əsaslandırmaya görə, təşəbbüs 2024-cü il avqustun 30-da imzalanmış Ermənistan və Azərbaycan arasında delimitasiya komissiyalarının birgə fəaliyyəti haqqında Əsasnamədən irəli gəlir.
Həmin əsasnamə ilə gələcəkdə sahəvi işlərin icrası üçün təlimatların qəbul edilməsi nəzərdə tutulmuşdu. Onların qəbulu komissiyaların normal fəaliyyətini təmin etmək və sahəvi işlərin icra üsullarını müəyyən etmək məqsədi daşıyır, həmçinin komissiyalara gələcək fəaliyyətlərini razılaşdırılmış prosedurlara uyğun həyata keçirməyə imkan verəcək. Layihənin müəllifi Ədliyyə nazirliyidir.
