Ermənistan hökuməti Rusiya bazarında ixracı məhdudiyyətlərlə üzləşə biləcək bütün erməni məhsullarını Avropa Birliyi ölkələrinə yönləndirmək üçün tələb olunacaq subsidiyaların həcmini artıq hesablayıb.
Bu barədə İqtisadiyyat naziri Gevorq Papoyan məlumat verib.
Onun sözlərinə görə, son illərdə erməni istehsalçıları məhsulun keyfiyyəti problemini həll ediblər və hazırda ən yüksək beynəlxalq standartlara cavab verirlər.
Respublikadakı bir çox istixana təsərrüfatları Avropa tələblərinə uyğunluğu təsdiq edən GLOBALG.A.P. sertifikatına malikdir – bu sertifikat hətta AB ölkələrindəki istehsalçıların hamısında da yoxdur.
Papoyan bildirib ki, hakimiyyət orqanları aqrar sektor nümayəndələri ilə Avropa bazarına çıxış üçün əsas maneələri artıq müzakirə edib.
Onun sözlərinə görə, keyfiyyət və istehsal həcmi məsələləri həll olunub, əsas çağırış isə logistikanın dəyəri olaraq qalır. Bununla əlaqədar hökumət məhsulların Avropa Birliyin
tədarükü zamanı nəqliyyat və gömrük xərclərinin subsidiyalaşdırılması mexanizmlərini nəzərdən keçirir.
Nazir qeyd edib ki, müvafiq hesablamalar artıq hökumətə təqdim edilib.
Onun qiymətləndirməsinə görə, erməni ixracının Rusiyadan AB-nə tamamilə yönləndirilməsi ssenarisi belə dövlət üçün maliyyə baxımından həyata keçirilə biləndir, baxmayaraq ki, hakimiyyət bu variantı son çarə və az ehtimal olunan hesab edir.
Erməni ixracatçılarının Rusiya bazarındakı çətinliklərini şərh edən Papoyan, mövcud problemlərin bir hissəsinin iyunun 7-də keçiriləcək seçkilərdən sonra yox ola biləcəyinə əmin olduğunu bildirib.
O, vurğulayıb ki, Ermənistan iqtisadi üstünlüklər naminə suverenlik və müstəqillik məsələlərindən imtina etmək niyyətində deyil və öz məhsullarının satışı üçün alternativ bazarlara sahib olmalıdır.
