Erməni kənd təsərrüfatı məhsullarına qarşı məhdudiyyətlərin tətbiqi səhv addımdır, çünki bu, insanları Avrasiya İqtisadi İttifaqına qarşı qoyur.
“İzvestiya”nın jurnalistinin sualına cavab olaraq bu haqda Ermənistanın Baş naziri Nikol Paşinyan Ermənistanın kənd təsərrüfatı məhsullarının ixracına qoyulan məhdudiyyətlərə münasibət bildirərkən deyib.
“Hesab edirəm ki, bunlar səhv addımlardır, çünki insanları Aİİ-yə qarşı qoyur. Mən isə Aİİ-də yüksək vəzifə tutan məmur olaraq bunu problem hesab edirəm. Amma biz bütün problemləri həll edəcəyik” – deyə Baş nazir bildirib.
Jurnalistin Ermənistanın kənd təsərrüfatı məhsulları ilə bağlı, xüsusilə fitosanitar nəzarət sahəsində mövcud problemlərin varlığını qəbul edib-etmədiyi sualına Paşinyan cavab verib ki, ayrı-ayrı şirkətlərə gəldikdə belə problemlər ola bilər.
“Ayrı-ayrı şirkətlərdə problemlər var və bu, hər yerdə, o cümlədən Rusiyada belədir. Lakin ümumilikdə, biz çox yaxşı nəzarət sisteminə sahibik və kənd təsərrüfatı məhsullarımızın keyfiyyətini yaxşılaşdırmaqda davam edirik” – deyə o qeyd edib.
“Rosselxoznadzor” 2026-cı il iyunun 2-dən Ermənistandan albalı, gilas, ərik, gavalı, şaftalı, nektarin və üzüm idxalına müvəqqəti məhdudiyyətlər tətbiq etdiyini, bunu fitosanitar tələblərin pozulması ilə əsaslandırdığını bildirib.
Əvvəllər Rusiya qurumu Ermənistandan bir sıra tərəvəzlərin idxalını da məhdudlaşdırmışdı.
