Ermənistanın Yüksək Texnologiyalar Sənayesi naziri Mxitar Hayrapetyan və Firebird AB şirkətinin həmtəsisçisi Aleksandr Yesayan iyunun 2-də “Zvartnots” hava limanına səfər ediblər.
Dünən sübh çağı 6144 NVIDIA Blackwell nəslinin qrafik prosessorundan ibarət ilk böyük partiya – 1792 GPU – Firebird AI meqa-layihəsinin birinci mərhələsinin həyata keçirilməsi üçün nəzərdə tutulmuş şəkildə çatıb.
“Birinci mərhələdə Hrazdanda təxminən 18 MVt gücündə müasir AI məlumat mərkəzinin – NVIDIA Blackwell memarlığı əsasında yüksək məhsuldarlıqlı hesablama resursları ilə işə salınması nəzərdə tutulur.
Mərkəz bir dəfə doldurulan və bir neçə il ardıcıl istifadə olunan qapalı su soyutma sistemindən istifadə edəcək ki, bu da yüksək enerji səmərəliliyi və etibarlı işi təmin edəcək” – deyə Yüksək Texnologiyalar Sənayesi nazirliyinin yaydığı məlumatda qeyd olunub.
Layihənin birinci mərhələsinə yatırılan investisiyanın həcmi təxminən 500 milyon ABŞ dolları təşkil edir. İkinci mərhələdə 4 milyard dollara qədər investisiya cəlb etmək və daha təxminən 42.000 qrafik prosessoru istismara vermək, Ermənistanı dünyanın ən güclü AI məlumat mərkəzlərinə sahib ölkələrin aparıcı beşliyinə çatdırmaq nəzərdə tutulur.
Birinci mərhələ istismara verildikdən sonra mərkəzdə 100-ə qədər yüksəkixtisaslı mütəxəssis çalışacaq, ikinci mərhələnin tikintisi və genişləndirilməsi işlərinə 1000-dən çox mütəxəssis cəlb olunacaq və yüksək maaşlı yeni iş yerləri yaradılacaq.
Layihənin mühüm komponentlərindən biri Ermənistan hökuməti ilə Firebird AI arasında imzalanmış 25 milyon dollarlıq strateji proqramdır ki, onun çərçivəsində dövlət 5 il müddətinə yüksək məhsuldarlıqlı AI hesablama resursları əldə edəcək – erməni startaplarını, elmi-tədqiqat qruplarını, universitetləri və mütəxəssisləri dəstəkləmək, habelə onların dövlət qurumlarında, texnologiya şirkətlərində və yüksək texnologiyalar sahələrinin tədqiqat və inkişaf proqramlarında tətbiqini təmin etmək üçün.
