Dünyada və regionda vəziyyət gərgindir və biz bu gərginliyin azaldılmasında və fundamental həll yollarının tapılmasında özümüzü məsuliyyətli hesab edirik. “Armenpress”in məlumatına görə, bunu ER baş naziri Nikol Paşinyan martın 24-də hökumətin növbəti iclasında deyib.
“Bu baxımdan, bəli, biz hesab edirik ki, Ermənistan və Azərbaycan arasında sülh danışıqları bir gün əvvəl başlamalıdır.
Eyni zamanda, sərhəd təhlükəsizliyi və sabitlik səviyyəsinin yüksəldilməsi istiqamətində addımlarla yanaşı, sərhədlərin demarkasiyası və delimitasiyası işləri sürətləndirilməlidir. Əlbəttə, bilirsiniz ki, biz Sovet dövründə Ermənistan və Azərbaycanın de-yure müəyyən edilmiş sərhədini əsas götürərək qoşunların sərhəddən qarşılıqlı geri çəkilməsini təklif etmişik”- deyə ER baş naziri qeyd edib.
Nikol Paşinyan məlumat verib ki, Ermənistan qoşunların tam çəkilməsindən əlavə, yerli qoşunların çıxarılması ilə bağlı da təkliflər verib və burada Azərbaycanın cavabını gözləyir.
“Xüsusən, Yerasx bölməsində biz təklif etmişik ki, bizim ərazimizdən bir neçə mövqe çıxarsınlar, biz də onların ərazisindən bir neçə mövqe çıxaraq ki, hər ikimiz də ən qaynar nöqtələrindən birinin məsələsini həll edək. Azərbaycanın cavabını gözləyirik”.
Baş nazir son hadisələrdən sonra Azərbaycanın regional kommunikasiyalar açmaq istəyib-istəməməsinin qeyri-müəyyən qalıdığını bildirib.
“Biz yaxşı başa düşmədik ki, Azərbaycan regional kommunikasiyalar açmaq istəyir, ya yox. O istəsə, bizim təkliflərimiz qüvvədə qalacaq və biz onları hər an, sözün əsl mənasında, hər an həyata keçirməyə hazırıq”- deyə Paşinyan vurğulayıb.
