Böyük Britaniya parlamentinin üzvü, Mühafizəkarlar Partiyasının üzvü, Böyük Britaniya-Ermənistan Dostluq Qrupunun sədri Tim Loutn Azərbaycanın Dağlıq Qarabağda etnik təmizləmə apardığını bəyan edərək, Böyük Britaniya hökumətini Azərbaycana qarşı sanksiyalar tətbiq etməyə çağırıb. “Armenpress” xəbər verir ki, bu barədə Tim Loutn Böyük Britaniya parlamentində “Dağlıq Qarabağ qaçqınlarına beynəlxalq dəstək” adlı müzakirələr zamanı deyib.
O xatırladıb ki, ötən il sentyabrın 19-da Azərbaycan Dağlıq Qarabağda genişmiqyaslı hücuma keçərək erməniləri nəsillər boyu yaşadıqları evlərdən çıxmağa məcbur edib.
O vurğulayıb ki, Azərbaycan əsrlər boyu həmin ərazidə yaşamış bir xalqın adını, mədəniyyətini, tarixini, irsini silməyə çalışır.
Loutn müzakirədə iştirak edən Böyük Britaniyanın Avropa məsələləri üzrə naziri Leo Dokertiyə müraciət edərək, onların Ermənistanla, bütün dünyada və Böyük Britaniyadakı erməni diasporu ilə humanitar öhdəlikləri və uzunmüddətli əlaqələri olduğunu vurğulayıb.
“Hökumət BMT-nin tərifləri altında etnik təmizləmə olub-olmadığını araşdıracaqmı?” Əgər belədirsə, bunun nəticələri nələrdir? Hökumət Azərbaycanda hələ də azərbaycanlılar tərəfindən saxlanılan siyasi məhbus və hərbi əsirlərlə rəftarın araşdırılmasını tələb edəcəkmi? Hökumət azərbaycanlılara Ermənistanın suveren ərazisindən çıxması üçün təzyiq göstərmək üçün nə edəcək?”,- deyə Loutn qeyd edib.
