Ermənistan və ABŞ arasındakı münasibətlər administrasiyadan asılı olmayaraq olduqca sabit institusional əsaslara malikdir.Bu haqda Ermənistanın xarici işlər nazirinin müavini Vahan Kostanyan bugünkü brifinqdə bildirib.
Nazir müavini xatırladıb ki, bu il Ermənistan və ABŞ münasibətləri strateji dialoq səviyyəsindən strateji tərəfdaşlıq səviyyəsinə qaldırmağa çalışdıqlarını elan ediblər.
Nazir müavini əmin olduğunu bildirib ki, hətta yeni administrasiya dövründə də bu işlər uğurla davam edəcək.
“Bu istiqamətdə intensiv işlər aparılır. İcazə verin əminliyimi bildirim ki, yeni administrasiya dövründə də bu işlər uğurla irəliləyəcək və başa çatacaq” – deyə Kostanyan qeyd edib.
O, gündəliyin ümumi dəyərlərə, demokratiyaya əsaslandığını vurğulayıb. Hazırda Ermənistan və ABŞ arasında iqtisadi əlaqələrin dərinləşdirilməsi də daxil olmaqla əməkdaşlıq gündəliyini genişləndirmək üçün işlər aparılır.
Kostanyan həmçinin ER Xarici işlər nazirliyinin və digər tərəfdaşların illər boyu ABŞ-da həm demokratlar, həm də respublikaçılarla daim əlaqə saxladıqlarını bildirib.
“ABŞ xalqının Donald Trampı 47-ci prezident olaraq seçdiyi faktı var və Ermənistan hökuməti seçilmiş yeni hakimiyyətlə işləyəcək”– deyə o, qeyd edib.
