“Euronews” xəbər verir ki, araşdırmanın ilkin nəticələri Aktaudakı fəlakətin səbəbinin Rusiya raketi olduğunu təsdiqləyib.
Azərbaycan hökuməti mənbələri bu gün telekanala eksklüziv müsahibəsində təsdiqləyiblər ki, çərşənbə günü Qazaxıstanın Aktau şəhərində “Azərbaycan Hava Yolları”na məxsus təyyarənin qəzaya uğramasına səbəb Rusiyanın “yer-hava” raketi olub.
Raket Qroznı səmasında PUA hücumunu dəf edərkən atılıb. Nəticədə təyyarənin yaxınlığında partlayıb və dağıntılar sərnişinlərə və ekipaj üzvlərinə düşüb.
Bakıdakı hökumət mənbələri Euronews-a bildiriblər ki, vurulan təyyarənin Rusiya hava limanlarına enməsinə icazə verilməyib. Pilotların xahişinə cavab olaraq, onlar təcili eniş üçün Xəzər dənizi üzərindən Qazaxıstanın Aktau şəhərinə uçmağı təklif ediblər.
Alınan məlumatlara görə, təyyarənin GPS naviqasiya sistemləri dəniz üzərindən bütün marşrut boyunca çalışmayıb.
