Rusiya Xarici işlər naziri Sergey Lavrov işgüzar səfərlə Moskvaya gələn Ermənistan xarici işlər naziri Ararat Mirzoyanla danışıqlarda bildirib ki, Rusiya Ermənistanla Azərbaycan arasında münasibətlərin bütün sahələrdə normallaşdırılmasına dəstək verməyə hazırdır.
Rusiya Ermənistan və Azərbaycan arasında münasibətlərin normallaşdırılmasına üçtərəfli razılaşmaların inkişafı istiqamətində dəstək verməyə hazırdır.
Bu razılaşmalar 2020 və 2022-ci illərdə üç ölkənin liderləri tərəfindən əldə olunub və bu razılaşmalar indiki şəraitdə, xüsusən də regionda mövcud vəziyyətin fonunda, əvvəlki kimi mühüm və aktualdır”- deyə Lavrov Mirzoyan-Lavrov danışıqlarının başlanğıcında bəyan edib.
Ermənistan Xarici işlər naziri Ararat Mirzoyan isə vurğulayıb ki, Ermənistan həmişə açıq və konstruktiv dialoq prinsipinə sadiq qalıb və ümid edir ki, gələcəkdə Rusiya tərəfi baş verən hadisələrin bütün aspektlərini nəzərə alacaq.
Birtərəfli şərhlərdən çəkinəcək. Mirzoyanın sözlərinə görə, təəssüf ki, biz son dövrlərdə bunu müşahidə edirik.
Danışıqlardan sonra Lavrov bildirib ki, Moskva ilə Yerevan arasında ünsiyyət boşluğu aradan qaldırılıb və məsələlərin açıq və səmimi müzakirəsi üçün tam razılaşma mövcuddur.
Moskva maraqlıdır ki, Rusiya-Ermənistan münasibətləri bölgədənkənar oyunçuların mənfi təsirinə məruz qalmasın.
“Biz maraqlıyıq ki, ikitərəfli münasibətlərimiz regiondan kənar güclərin mənfi təsirindən azad olsun. Bu güclər Rusiya və Ermənistan arasında müttəfiqlik münasibətlərinin güclənməsini istəmirlər”- deyə Lavrov qeyd edib.
Bunun ardınca Lavrov Syünikdə konsulluq açmaq niyyəti ilə bağlı açıqlama verib:
“Biz strateji baxımdan əhəmiyyətli olan Sünik vilayətində konsulluq açma perspektivlərini müzakirə etdik. Biz əminik ki, diplomatik heyətin genişləndirilməsi hər iki ölkənin maraqlarına cavab verir”.
Sergey Lavrov əlavə edib ki, Moskva regiondan uzaqda yerləşən oyunçulardan fərqli olaraq,Yerevanla Bakı arasında münasibətlərin normallaşmasında maraqlıdır.
O, erməni jurnalistin Azərbaycan-Ermənistan münasibətlərində Rusiyanın və Azərbaycanın mövqelərinin tez-tez üst-üstə düşməsi ilə bağlı fikirlərinə razı olmadığını bildirib. Lavrov qeyd edib ki, Rusiya Ermənistan-Azərbaycan məsələsində birtərəfli mövqe tutmayıb.
“Sualdan belə bir təəssürat yaranır ki, bizim birtərəfli mövqeyimiz var, amma bu belə deyil. Biz aktual məsələlərlə yanaşı,Yerevan və Bakı arasında münasibətlərin normallaşdırılması ilə də məşğul oluruq.
Biz qardaş xalqlarımızın sülh və mehriban qonşuluq şəraitində yaşaması ilə dərindən maraqlanırıq” – deyə Lavrov vurğulayıb.
Onun sözlərinə görə, Moskva bu münasibətlərin normallaşdırılması ilə maraqlıdır. Regiondan uzaqda yerləşən ölkələr isə Cənubi Qafqazda gərginliyin saxlanılmasına yönəlmiş gündəmi irəli sürürlər.
Rusiya Xarici işlər naziri bildirib ki, Moskva Ermənistan və Bakı arasında üçtərəfli formatda razılaşdırılmış razılaşmalara əsaslanır.
Lavrovun sözlərinə görə, Rusiya münasibətlərin normallaşdırılmasına, sərhədlərin delimitasiyası və kommunikasiyaların açılması da daxil olmaqla, bütün məsələlərdə dəstək verməyə hazırdır.
O, 3+3 məsləhətləşmələr platformasının səmərəli olduğunu düşünür.
Ermənistan-İran sərhədindən rus sərhədçilərinin çıxarılması ilə bağlı jurnalistlərin suallarına cavab olaraq, Ararat Mirzoyan burada qalmaqal axtarmamağa çağırıb.
O bildirib ki, rus sərhədçiləri Ermənistanın müstəqilliyinin ilk günündən etibarən Ermənistan-İran sərhədinin təhlükəsizliyinin təminatına müvəqqəti cəlb olunmuşdular. Nazir həmçinin Rusiya-İran strateji razılaşmasını xatırladıb:
“Səmimi deyim ki, Ermənistan-İran sərhədi həmişə sakit olub, niyə narahat olmalı olduğumuzu anlamıram. Bu sərhəd həmişə sakit olub.
KTMT üzvlüyü ilə bağlı onu qeyd etməliyəm ki, Rusiya ilə ikitərəfli əlaqələrimiz kifayət qədər ciddi və güclüdür. Biz müttəfiqik. İranla isə mehriban qonşuluq və tərəfdaşlıq münasibətlərimiz var.
Rusiya və İran arasında yaxşı tərəfdaşlıq yaranır və düşünürəm ki, bütün ölkələr bu əməkdaşlıqdan faydalanacaqlar”.
Jurnalistlərlə görüşdən əvvəl Lavrov danışıqların başlanğıcında vurğulayıb ki, Moskva ilə İrəvan arasında ticarət-iqtisadi əlaqələr inkişaf edir və rekord səviyyəyə çatıb – demək olar ki, 12 milyard dollar.
Daha sonra Mirzoyan Ermənistanın Avropa Birliyinə üzvlük qanun layihəsinin qəbul edilməsi və Avrasiya İqtisadi Birliyi çərçivəsində əməkdaşlıq məsələsinə aydınlıq gətirib.
O, qeyd edib ki, Ermənistanın AB-yə üzvlük qanun layihəsində konkret müddətlər və mexanizmlər yoxdur, bundan sonrakı addımlar sonradan müzakirə olunacaq.
Həmçinin qeyd edib ki, Avrasiya İqtisadi İttifaqı çərçivəsində ticarət-iqtisadi əməkdaşlıq, o cümlədən Rusiya ilə olan əməkdaşlıq Ermənistan üçün iqtisadi artım və xarici ticarət potensialının reallaşmasına təsir göstərən amillərdəndir.
