Azərbaycanda həbs olunmuş elmi tədqiqatçı və talışşünas İqbal Abilov “Talış nitqinin fraqmentləri I” adlı kitab nəşr etdirdi. Bu haqa Toplum TV onun hüquqlarını müdafiə komitəsinə istinadən bildirir.
Kitab rus dilində nəşr olunub və XIX əsrin ikinci yarısında alman-rus şərqşünası Boris Dorn tərəfindən toplanmış nadir əlyazmaları özündə birləşdirir.
Bu materiallar daha əvvəl, 2012-ci ildə Abilov tərəfindən arxivlərdə aşkar edilmişdi.
“Bu materiallar xüsusilə şimali talış dialektinin ən qədim elmi tədqiqatlarından biri kimi qiymətlidir” — deyə komitənin bəyanatında qeyd olunur.
Kitab Talış Milli Akademiyası tərəfindən qurulan yeni “Bibliotheca Talyshica” seriyasının ilk buraxılışıdır. İqbal Abilov bu təşəbbüsün həmtəsisçilərindən biri idi.
Seriyanın məqsədi elmi ictimaiyyətə talış dilində çap olunmamış əsərləri, həmçinin orta əsrlərdən müasir dövrə qədər talış alimlərinin irsini təqdim etməkdir.
Nəşrdə linqvistika, arxeologiya, coğrafiya və antropologiya sahələrində daha əvvəl geniş ictimaiyyətə məlum olmayan arxiv tədqiqatları yer alacaq.
Xatırladaq ki, 20 may tarixində Lənkəran Ağır Cinayətlər Məhkəməsi İqbal Abilova 18 il azadlıqdan məhrumetmə cəzası təyin etmişdi.
Belarusda yaşayan alim 22 iyul 2024-cü ildə Azərbaycana qohumları ilə görüşmək üçün gəldiyi zaman həbs edilmişdi.
Abilova Cinayət Məcəlləsinin bir neçə maddəsi ilə ittiham irəli sürülüb: dövlətin xəyanəti, xarici təşkilatların tapşırığı ilə dövlətə qarşı ictimai çağırışlar, habelə milli və ya dini düşmənçilik təhriki.
Abilovun hüquqlarını müdafiə komitəsi onun siyasi fəaliyyətlə məşğul olmadığını bildirir.
“İqbalın yeganə “cinayəti” elmi obyektivlik, vicdanlı tədqiqatlar və mədəni irsin qorunmasıdır” — deyə komitədə vurğulanıb.
