ABŞ Nümayəndələr Palatasının Xarici Əlaqələr Komitəsinin üzvü və Konqresin Ermənilər Qrupunun sədr müavini Bred Şerman ABŞ-ın Azərbaycana mümkün silah ötürülməsinə qarşı çıxış edib və Azərbaycanı bütün erməni hərbi əsirləri azad etməyə çağırıb.
“Azərbaycan təcavüzünə görə cavab verməlidir. ABŞ-ın Ermənistana müdaxiləsi və dəstəyi vacib olsa da, Birləşmiş Ştatlar Ermənistanın ədalətli və real təhlükəsizlik zəmanətləri almasını təmin etmək üçün daha sərt mövqe nümayiş etdirməlidir”, – konqresmen bildirib.
Şerman vurğulayıb ki, Birləşmiş Ştatlar ABŞ-ın Azərbaycana hərbi yardımını qadağan edən 907-ci maddəsini heç bir halda dayandırmamalıdır.
“Azərbaycan qüvvələri erməni hərbi əsirləri qanunsuz olaraq saxlamağa davam edir. Bütün erməni hərbi əsirlər dərhal və qeyd-şərtsiz azad edilməlidir”, – konqresmen vurğulayıb.
