Türkiyənin “Haber Sol” qəzetinin Ruandanın “Umuseke” xəbər portalına istinadən verdiyi məlumata görə, Azərbaycan NATO ölkələri ilə birlikdə Sudan üsyançılarını da cəlb edən, üç qitəni əhatə edən mürəkkəb qaçaqmalçılıq marşrutu ilə Ukraynaya silah tədarük edir.
Qeyd edilir ki, yüklərin daşınması Azərbaycan Müdafiə nazirliyinə tabe olan sənaye birliyi tərəfindən təşkil edilib. Mənbələrin məlumatına görə, tədarük olunan silahlar arasında aviabombalar, daşınan zenit-raket kompleksləri pilotsuz uçuş aparatlarının (PUA) komponentləri, “Tisas” markalı tapançalar və əsasən Türkiyə lisenziyası ilə istehsal edilən digər avadanlıqlar var.
Silahlar “humanitar yardım” kimi markalanır və Türkiyə vasitəsilə tranzit keçir.
“Umuseke” mənbələrinin məlumatına görə, silahlar əvvəlcə Türkiyəyə çatdırılır. Qaziantep bölgəsindəki “Değirmen Makina” müəssisəsində yük “humanitar yardım” kimi yenidən təyin edilir, daha sonra Türkiyənin “Yıldız Line” və Almaniyanın “AGL Forwarding” şirkətlərinin gəmiləri ilə Sudanın limanına göndərilir.
Vurğulanır ki, aprel 2023-cü ildən Sudan Ordusu ilə “Tez Müdaxilə Qüvvələri” (RSF) arasında münaqişənin davam etdiyi Sudanda yüklər yenidən qablaşdırılır və “Sudan mənşəli silahlar” kimi təqdim edilir.
Mənbələrin məlumatına görə, daha sonra silahlar İsveçrənin “Mediterranean Shipping Company” şirkəti vasitəsilə Almaniyanın Hamburq limanına daşınır, oradan isə quru yolu ilə Ukraynaya çatdırılır.
Nəşrin qiymətləndirməsinə görə, bu planın məqsədi Rusiyadakı güc balansını pozmaq ola bilər. Bununla belə, qeyd edilir ki, bu yanaşma Moskvanı siyasi və ticarət tərəfdaşı olan Azərbaycana qarşı sanksiya tətbiq etməyə təhrik edə bilər.
