Sova News xəbər verir ki, Gürcüstanın xarici işlər naziri Maka Boçorişvili bəyan edib ki, sovet dövründə formalaşmış siyasi elitanın Avropa İttifaqının rəhbər orqanlarında təsiri hələ də qalmaqdadır.
2004-cü ildə Aİ-nin genişlənmə prosesindən danışan XİN rəhbəri qeyd edib ki, o zaman postsovet ölkələrinin Aİ-yə daxil olmağa hazır olması, xüsusən də Fransada fəal şəkildə müzakirə olunurdu. Onun sözlərinə görə, o vaxt tez-tez bəyanatlar verilirdi ki, digər keçmiş sovet respublikaları kimi Gürcüstan da üzvlüyə hazır deyil.
Boçorişvili 2004-cü ildə Aİ-nin genişlənməsinin “xüsusilə üzvi” olmadığını və bir sıra həll olunmamış problemlərin qaldığını vurğulayıb.
“Bu problemlər ondan irəli gəlir ki, heç bir nəsil dəyişikliyi olmayıb və bu gün biz Brüsseldə kommunist və sovet dövründə siyasi elitanın bir hissəsi olan insanları görürük. Onlar Aİ strukturları daxilində özlərini təsdiqləyiblər və sovet dövründə istifadə etdikləri üsullarla Avropa İttifaqında siyasət aparmağa davam edirlər”, – nazir bildirib.
