Ermənistan İqtisadiyyat Nazirliyi Azərbaycan mediasının Azərbaycandan ikinci neft məhsullarının idxalı ilə bağlı yaydığı məlumatı təsdiqləyib.
“Armenpress”in sorğusuna cavab olaraq, Ermənistan Respublikası İqtisadiyyat Nazirliyinin mətbuat katibi Lilit Şaboyan başqa heç bir təfərrüat vermədən Azərbaycan mediasının yaydığı məlumatı təsdiqləyib. Yanvarın 7-də Azərbaycan mediası Bakının 8 yanvarda Ermənistana daha böyük partiya neft məhsulları göndərəcəyi barədə məlumat yayıb.
Qeyd edilib ki, bu dəfə 1000 ton A92 benzini, eyni miqdarda dizel yanacağı və 1800 ton A95 benzininin daşınması planlaşdırılır.
Qeyd edək ki, neft məhsulları ilk dəfə Azərbaycandan Ermənistana 2025-ci ilin sonunda idxal edilib. Dekabrın 19-da Azərbaycandan Gürcüstan vasitəsilə Ermənistana göndərilən Azərbaycan benzini ilə yüklənmiş qatar “Ayrum” dəmir yolu stansiyasına çatıb. Qatar 1218 ton A-95 benzini ilə yüklənmiş 22 vaqondan ibarət idi.
