ER Parlamentinin sədri sədri Alen Simonyan Azərbaycan parlamentinin sədri Sahibə Qafarova ilə görüşünü müsbət qiymətləndirib.
Alınan məlumata görə, Alen Simonyan bu barədə görüşdən sonra azərbaycanlı Real TV-yə verdiyi müsahibədə deyib.
“Görüş yaxşı keçdi, fikir ayrılıqları olmayıb. Bəlkə təəccüblənəcəksiniz, amma fikir ayrılıqları yoxdur. Qarşılıqlı anlaşma, əməkdaşlıq və gələcəyə dair planlar var.
Müzakirələr zamanı biz maneələrlə qarşılaşmadıq və ümid edirəm ki, maneələr olmayacaq da” – deyə Simonyan bildirib.
Ermənistan və Azərbaycan arasında yaradılmış ticarət-iqtisadi əlaqələrə toxunan Alen Simonyan qarşılıqlı ticarəti inkişaf etdirmək zərurətini vurğulayıb.
“Mən çoxdandır deyirəm ki, bizə ticarət lazımdır. Mən hesab edirəm ki, biz bu əməkdaşlığı genişləndirməliyik. Bildiyim qədər, iş adamları, hökumətlər və müvafiq qurumlar artıq bu istiqamətdə çalışırlar və bu, çox yaxşıdır.
Bu işi hər iki ölkənin xeyrinə dərinləşdirməyə davam etmək lazımdır” – deyə Ermənistan Parlamentinin sədri sədri qeyd edib.
Simonyan həmçinin iki ölkənin vətəndaş cəmiyyətlərinin qarşılıqlı səfərlərini də müsbət qiymətləndirib.
