Eurasianet yazır ki, Ermənistan Azərbaycanla uzunmüddətli sülhü təmin etmək məqsədilə eyni zamanda Hindistanla hərbi tərəfdaşlığını gücləndirməyə çalışır.
Jurnal India Defense Research Wing-in (IDRW) dərc etdiyi hesabata istinad edir və bu hesabata əsasən, Ermənistan 155 mm-lik artilleriya mərmiləri və Pinaka raket sistemləri də daxil olmaqla, Hindistan sursatının istehsalı üçün öz daxili istehsal xətlərini yaratmaq niyyətindədir.
Hesabatda bu məsələ ilə bağlı ikitərəfli danışıqlarda nə qədər irəliləyiş əldə edildiyi, mümkün razılaşmanın ehtimal olunan həcmi və ya dəyəri göstərilmir.
Eurasianet vurğulayır ki, son illərdə Cənubi Qafqaz faktiki olaraq Cənubi Asiyada Hindistan və Pakistan arasında şiddətli rəqabətin davamına çevrilib. Ermənistan Hindistanla müdafiə əlaqələri qurarkən, Azərbaycan, Pakistan və Türkiyə təhlükəsizlik tərəfdaşlığı yaradıblar.
Ermənistan üçün Hindistanla strateji əlaqələrin artması Yerevanın tarixən ölkənin müttəfiqi olan Rusiya ilə hazırkı gərgin münasibətlərini əks etdirir.
Atlantik Şurasının 2025-ci ildə dərc etdiyi təhlildə deyilir: “Bu tərəfdaşlıq təkcə Ermənistanın müdafiə qabiliyyətini gücləndirmir, həm də Hindistana Cənubi Qafqazda təsirini genişləndirməyə imkan verir və burada o, Azərbaycanı dəstəkləyən Türkiyə və Pakistan ittifaqlarının müqaviməti ilə üzləşir”.
