Azərbaycan tərəfindən Laçın dəhlizində keçid məntəqəsinin yaradılması 9 noyabr bəyanatının pozulmasıdır. Bunu NEWS.am-a açıqlamasında rusiyalı politoloq Mixail Aleksandrov deyib.
Onun sözlərinə görə, Azərbaycan bu pozuntuya əl ataraq, yalnız bir şeyə nail olmağa çalışıb: Dağlıq Qarabağı Azərbaycanın tərkibinə daxil etmək, bunun üçün isə etnik təmizləmə aparmaqla erməni əhalisini Dağlıq Qarabağdan sıxışdırıb çıxarmalıdır.
“Ona görə də insanlara dözülməz şərait yaratmağa çalışır. Bu keçid məntəqəsi nəqliyyat və ticarəti məhdudlaşdıracaq. Nəticədə insanlar getdikcə gedəcək, Dağlıq Qarabağ yaşam üçün cəlbedici olmayacaq və 2025-ci ildə Azərbaycan Rusiya sülhməramlılarının çıxarılmasını tələb edəcək, öz qoşunlarını ora daxil edəcək, erməni əhalisinin qalıqlarını sıxışdırıb çıxaracaq. Həmin vaxt eskalasiya mümkün olacaq”, – deyə o bildirib.
Ekspert hesab edir ki, 2025-ci ilə qədər Dağlıq Qarabağ yavaş-yavaş boğulacaq: “Əliyev Rusiya sülhməramlılarına birbaşa hücumun Rusiyanı reaksiya verməyə məcbur edəcəyini anlayaraq Saakaşvili kimi hərəkət etməyəcək. Bakı kiçik addımlar taktikası ilə hərəkət edəcək, Dağlıq Qarabağ daxilində mövqelərini irəli aparacaq və başqa təxribatlara əl atacaq”, – Aleksandrov əlavə edib.
O qeyd edib ki, Azərbaycan Ukraynadakı vəziyyətdən istifadə edir və ümid edir ki, Rusiya münasibətlərini pozmaq və ya Dağlıq Qarabağda güc qarşıdurmasına girmək istəməz.
“Buna görə də Bakı təzyiq göstərir və üzərinə götürdüyü öhdəlikləri pozur. Ukrayna münaqişəsi olmasaydı, Azərbaycan belə riskə getməzdi”, – deyə politoloq yekunlaşdırıb.
