Ermənistan, Azərbaycan və Rusiya baş nazirlərinin müavinlərinin üçtərəfli işçi qrupu formatında görüşlər keçirilib, nəticədə hərtərəfli sənəd layihəsi formalaşdırılıb. “Armenpress”in məlumatına görə, bu barədə TASS-a müsahibəsində Rusiya Federasiyası baş nazirinin müavini Aleksey Overçuk bildirib.
Sənəddə bildirilir ki, regionda nəqliyyat əlaqələrinin açılması Yerasx-Culfa-Meğri-Horadiz marşrutu ilə keçəcək dəmir yolunun bərpası ilə başlayacaq və tərəflərin suverenliyinə hörmət əsasında əsas Azərbaycan və Ermənistan sərhədinin keçməsi proseduru ilə bağlı yanaşmaları qeyd edir.
“Tərəflərdən heç biri bu yolun ayrı-ayrı hissələrinin onların ərazisində yerləşdiyi ölkənin yurisdiksiyasına keçəcəyini şübhə altına almır, ona görə də yol ilə bağlı Azərbaycanda Azərbaycan qanunvericiliyi, Ermənistanda isə Ermənistan qanunvericiliyi tətbiq olunacaq. Görünür, bunlar göz qabağında olan şeylərdir, lakin iki dövlət və xalq arasında formalaşmış münasibətləri nəzərə alaraq, bütün bunlar düzəldilməlidir”, – deyə Overçuk bildirib.
Onun sözlərinə görə, dünyada müharibə edən tərəflərin danışıqlar masası arxasına əyləşərək, demək olar ki, hərbi əməliyyatlar dayandırıldıqdan sonra nəqliyyat əlaqələrinin bərpası haqqında danışmağa başlaması nümunələri tapmaq çətindir. Belə olan halda hamı başa düşür ki, Azərbaycanla Ermənistan arasında sülhə alternativ yoxdur və sülhə nail olmağın ən yaxşı yolu insanlar üçün dinc qarşılıqlı əlaqə imkanlarının açılması, sərnişin və yük daşımaları üçün ümumi yol tikintisidir. Normal həyat və ticarət bərpa edildikdən sonra köhnə kin problemi tədricən arxa plana keçəcək.
“Ən böyük problem inamdır. Məhz buna görə də danışıqlar ləng gedir. Sonda yola sadə insanlar çıxacaq: azərbaycanlılar, ermənilər, başqa dövlətlərin vətəndaşları. Onlar sərhədi keçərkən bir-biri ilə necə qarşılıqlı əlaqədə olacaqlar, başqa dövlətin ərazisindən keçərkən onların təhlükəsizliyi necə təmin olunacaq? Bu gün cavab vermək istədiyimiz əsas sual budur: başqa ölkənin ərazisində həmin insanların başına pis heç nə gəlməyəcəyinə əmin olmaq. Və təbii ki, sərhəddə baş verənlər hamımıza təsir edir. Atışma dayandırılsa, həll yollarını tapmaq çox asan olardı”, – deyə Rusiya baş nazirinin müavini bildirib.
Overçukun sözlərinə görə, tərəflər fasilələr verir, ekspertləri cəlb edir, istənilən təklif və qərarlar çox hərtərəfli və dəqiq təhlilə məruz qalır ki, ölkələr arasında hər şey olduğu kimi işləsin.
Sənədin layihəsi baş nazirin müavinləri səviyyəsində hazırlanıb və demək olar ki, tamamilə razılaşdırılıb, baxmayaraq ki, “sadə azərbaycanlılar və ermənilər sərhədi keçərkən necə ünsiyyət quracaqlar” məsələsi üzərində hələ də işləmək lazımdır.
“Sənədi tələm-tələsik imzalamaq naminə heç kim insanların və malların göstərilən marşrut üzrə təhlükəsiz hərəkətini arxa plana keçirməyəcək. Bu, blokadanın nə vaxt götürüləcəyi ilə bağlı suala hələ də cavab verməyən çox vacib məqamdır”, – deyə Rusiya baş nazirinin müavini yekunlaşdırıb.
