AB-nin Ermənistandakı Monitorinq missiyası Cənubi Qafqazda sabitliyə töhfə verir və cari hadisələrlə bağlı şəffaflığın təmin edilməsində mühüm amildir.
Jurnalist xəbər verir ki, bu haqda Ermənistan Respublikası Təhlükəsizlik Şurasının katibi Armen Qriqoryan, AB-nin Ermənistandakı Monitorinq missiyasının 1 illiyinə həsr olunmuş tədbirdə məlumatlandırıb.
O, xatırladıb ki, ötən il AB-nin missiyası üçün mühüm mərhələ olub, bu müddət ərzində missiyanın yerləşdiyi yerlər, kadr təminatı və fəaliyyətinin hüquqi bazası ilə bağlı bir sıra məsələlər öz həllini tapıb və böyük irəliləyiş əldə edilib.
“Əminliklə deyə bilərəm ki, bu müddət ərzində biz həm də missiya ilə Ermənistan Respublikasının departamentləri arasında əməkdaşlığı yaxşılaşdırmış və bir sıra səmərəli kommunikasiya formatları yaratmışıq.
Ermənistandakı missiya bizim üçün çətin bir dövrdə yerləşdirilib və Ermənistanla Azərbaycan arasında beynəlxalq səviyyədə tanınmış sərhədin bütün uzunluğuna nəzarət etmək kimi mühüm funksiyanı yerinə yetirir.
Qiymətləndirməmizə görə, missiya regionun sabitliyinə töhfə verir və cari hadisələrlə bağlı şəffaflığın təmin edilməsində mühüm amildir.
“Biz hesab edirik ki, müxtəlif ölkələrdən missiyaya qarşı əsassız tənqidlər yolverilməzdir və biz missiyanın mandatının tam şəkildə həyata keçirilməsinin tərəfdarıyıq” – deyə Qriqoryan bildirib.
O, qeyd edib ki, Ermənistan tərəfi bu mühüm missiyaya verdiyi töhfəyə görə AB-nin iyirmidən çox üzvü ölkəsinə, Brüssel rəhbərliyinə və missiyanın əməkdaşlarına təşəkkür etmək istəyir.
“Biz ümid edirik və gözləyirik ki, bütün AB-nə üzv dövlətlərin nümayəndələrini missiyada görəcəyik. Biz həmçinin Kanadanın missiyada iştirakını və Norveçin missiyaya qoşulmaq istəyini alqışlayırıq” – deyə Qriqoryan yekunlaşdırıb.
Bu günlərdə Azərbaycanın Xİ nazirliyi AB-nin Ermənistandakı Monitorinq missiyasına qarşı əsassız ittihamlar səsləndirərək, missiyanın Cənubi Qafqazın sabitliyinə töhfə vermədiyini, əksinə, Azərbaycan əleyhinə təbliğatla məşğul olduğunu qeyd edib.
