Ermənistan faktiki olaraq Kollektiv Təhlükəsizlik Müqaviləsi Təşkilatı (KTMT) çərçivəsində fəaliyyətini dondurdu. Bu, dövlətin siyasi qərarı və mövqeyidir, bunu hüquqi proseslərlə qarışdırmaq olmaz.
“Armenpress”in məlumatına görə, bunu baş nazir Nikol Paşinyan martın 12-də keçirdiyi mətbuat konfransında qeyd edib xatırladaraq ki, Ermənistan strukturun iclaslarında iştirak etmir, KTMT-də daimi nümayəndəsi yoxdur, baş katibin müavini təyin etmək üçün öz kvotasından istifadə etmir, KTMT-də yayılan sənədlərə münasibət bildirmir.
“Siyasi qərarlar və mövqelər hüquqi proseslərlə qarışdırılmamalıdır. Bəli, biz faktiki olaraq KTMT-dəki fəaliyyətimizi dondurmuşuq”, – deyə baş nazir bildirib.
O, Ermənistan tərəfinin KTMT-yə münasibətdə mövqeyinin nə dərəcədə vicdanlı, ədalətli və mənəvi cəhətdən düzgün olmasından danışaraq qeyd edib ki, ER-nin KTMT-dən xahişi və tələbi birdir, strukturun Ermənistan Respublikasındakı məsuliyyət sahəsinin nədən ibarət olduğunu dəqiqləşdirmək. “Biz KTMT ilə bağlı problem yaratmamışıq. Bütün problemlər o vaxtdan yarandı ki, biz KTMT-nin ER-də məsuliyyət sahəsi nədir sualını qaldırdıq və biz bu suala cavab almadıq”, – Paşinyan bildirib.
Baş nazir qeyd edib ki, müxtəlif müzakirələr zamanı Ermənistan KTMT-dəki tərəfdaşlarından və Rusiya Federasiyasından fikir ayrılığına və yanlış şərhə yer qoymayan, çox aydın mövqe alıb ki, Ermənistanın suveren ərazisi onlar üçün qırmızı xəttdir. Lakin 2021-ci ilin mayında, 2021-ci ilin noyabrında, eləcə də 2022-ci ilin sentyabrında həmin qırmızı xətdə hadisələr baş verdi, halbuki KTMT Nizamnaməsində qeyd olunan addımlar atılmadı və böhran vəziyyətlərinin qeydə alınması proseduru əməl edilmədi.
Paşinyan qeyd edib ki, KTMT Ermənistanın suveren ərazisi kimi nəyi nəzərdə tutduğu sualına cavab verərsə və bu cavab erməni tərəfinin ideyalarına uyğun gələrsə, bu o demək olacaq ki, Ermənistanla KTMT arasında problemlər həll olunacaq. “Əgər belə olmasa, Ermənistan KTMT-dən çıxacaq. Nə vaxt deyə bilmərəm”, – deyə baş nazir yekunlaşdırıb.
