Gürcüstanın keçmiş prezidenti Salome Zurabişvili qeyd edib ki, Ermənistanla ABŞ arasında strateji tərəfdaşlıq regionda sabitliyə və sülhə töhfə verir.
Bu barədə Zurabişvili X mikrobloqunda yazıb.
“ABŞ və Ermənistan arasındakı bu strateji tərəfdaşlıq həm regionumuza, həm də onun sabitliyi və sülhünə fayda verən irəliyə doğru tarixi bir addımdır. Yeni seçkilər xalqın iradəsinin həyata keçirilməsini təmin edən zaman Gürcüstan ABŞ-la strateji tərəfdaşlığını da bərpa edəcək”, – Zurabişvili yazıb.
Yanvarın 14-də Vaşinqtonda Ermənistan və ABŞ arasında strateji tərəfdaşlıq sənədi olan Ermənistan-ABŞ Strateji Tərəfdaşlıq Xartiyası imzalanıb. Ermənistanın xarici işlər naziri Ararat Mirzoyan imzalanma mərasimində qeyd edib ki, Ermənistan-ABŞ Strateji Tərəfdaşlıq Xartiyası möhkəm təməl təşkil edir və iki ölkə arasında əməkdaşlığı daha da iddialı edir.
