Ermənistan və Türkmənistan “Türkmənqaz” dövlət konsernindən təbii qazın alınması ilə bağlı danışıqlar aparır. Bu da türkmən qazının İran vasitəsilə Ermənistana çatdırılmasına imkan verəcək.
Bunu Yerevanda keçirilən Ermənistan Respublikası və Türkmənistan arasında iqtisadi əməkdaşlıq üzrə Hökumətlərarası Komissiyanın 10-cu iclası zamanı ER baş nazirinin müşaviri Artaşes Tumanyan deyib.
Tumanyan qeyd edib ki, son bir neçə ildə Ermənistan nümayəndə heyətləri Türkmənistana bir neçə səfər edib, səfər zamanı enerji və müxtəlif əlaqəli sektorlarla bağlı bir sıra proqramlar müzakirə olunub.
“Əvvəla, erməni tərəfi “Türkmənqaz” dövlət konsernindən təbii qazın alınmasına dair saziş hazırlamaq istəyini ifadə edib, bununla bağlı bir neçə raund danışıqlar aparılıb. Bu görüşlər zamanı erməni tərəfinin gözləntiləri və baxışları təqdim edilib və proqramın bütün texniki xüsusiyyətləri müzakirə olunub. Layihənin mahiyyəti belədir: “Türkmənqaz”dan alış-veriş etmək, onun SWOP sxemi üzrə İran ərazisi vasitəsilə mübadiləsini təşkil etmək və onu İran-Ermənistan sərhədinə çatdırmaq”, – Tumanyan deyib.
Sonuncu onu da qeyd edib ki, İran proqramın mühüm, əsas iştirakçılarından biri olduğundan, Tehranla da danışıqlar aparılıb və nəticədə İran proqramın həyata keçirilməsinə razılıq verib. Planda kəmiyyət göstəricisi də göstərilib. Qeyd etməliyəm ki, bu günə qədər həmin sövdələşmənin mühüm tərkib hissəsi olan qazın qiymətinin razılaşdırılması üzrə işlər başa çatdırılmayıb və danışıqlar davam edir”.
Onun sözlərinə görə, həmin danışıqlar zamanı türkmən qazının eyni SWOP sistemi ilə Ermənistan ərazisindən Gürcüstana ixracı da müzakirə olunub. Tumanyanın sözlərinə görə, Gürcüstan tərəfi də bu məsələ ilə bağlı müsbət cavab verib.
Tumanyan qeyd edib ki, erməni-türkmən danışıqlarının ikinci proqramı Aşqabaddan müsbət cavab alan Türkmənistandan elektrik enerjisinin alınmasına aiddir.
Üçüncü istiqamət Türkmənistanın neft-qaz kompleksinin müxtəlif məhsullarının Ermənistana, bəlkə də digər istiqamətlərdə də əldə etmə və tədarük imkanlarına aiddir.
