İran beş illik fasilədən sonra Fars körfəzinin şelfində neft və qaz axtarışlarını bərpa etməyə hazırlaşır. Bu barədə İranın Milli Neft Şirkətinin (NIOC) kəşfiyyat idarəsinin rəhbəri Mohiəddin Cəfəri məlumat verib, xəbər verir Mehr.
O, şənbə günü bildirib ki, 2019-cu ildən bəri dənizdə axtarış işləri dayandırılmışdı – səbəb isə dəniz qazma avadanlıqlarının çatışmazlığı olub.
Lakin Cəfərinin sözlərinə görə, yeni tender nəticəsində dəniz qazma avadanlığı olan podratçı seçilib və bu, 2025-ci ildə qonşu ölkələrlə sərhəd zonalarda işlərin bərpasına yol açır.
Son altı yarım ay ərzində NIOC-nin geoloji kəşfiyyat qrupu həm əsas, həm də operativ axtarış fəaliyyəti ilə məşğul olub, deyə Cəfəri qeyd edib. O əlavə edib ki, İran prezidenti Məsud Pəzəşkiyanın rəhbərlik etdiyi administrasiya son 30 ildəki geoloji kəşfiyyat fəaliyyətlərinin inkişafını təhlil etmək və qiymətləndirmək niyyətindədir.
Cəfəri bildirib ki, hökumətin əsas prioritetlərindən biri yataqların aşkar olunması tempini sürətləndirməkdir – bunun üçün isə qazma qurğularının sayını artırmaq və müasir geofiziki avadanlıqlardan istifadə nəzərdə tutulur.
“Əgər bu iki sahədə uğur qazansaq, axtarış tempini ikiqat artıra bilərik”, – deyə o əlavə edib.
