Yerusəlim Erməni Patriarxlığı Rusiya Pravoslav Kilsəsinin Əliyevanı təltif etməsini pisləyib
Yerusəlim Erməni Patriarxlığı, Rusiya Pravoslav Kilsəsinin Patriarx Kirillin Azərbaycanın birinci vitse-prezidenti Mehriban Əliyevanı təltif etməsini qətiyyətlə pisləyib.
Patriarxlığın yaydığı bəyanat aşağıdakı kimidir:
“Rusiya Pravoslav Kilsəsi, Azərbaycanın birinci xanımını – Mehriban Əliyevanı Müqəddəs Olqa ordeni ilə təltif etməklə cəfəng və axmaq bir hərəkət etmişdir. Bu orden adətən cəmiyyət daxilində xristian dəyərlərinin qorunmasına, mədəniyyətlərarası və dinlərarası dialoqun təşviqinə töhfə verən şəxslərə təqdim olunur. Bu məntiqsiz addımı ilə Rusiya Pravoslav Kilsəsi öz nüfuzunu sarsıtmışdır. İlham Əliyevin avtoritar hakimiyyəti altında Azərbaycan, Artsaxın (Qarabağın) erməni-xristian irsini məhv etməyə yönəlmiş sistemli bir kampaniya həyata keçirmişdir. Şuşada və digər bölgələrdəki bir neçə kilsə dağıdılmış və ya məscid kimi istifadə edilmək üçün yenidən qurulmuş, əsrlərdir orada mövcud olan erməni izləri silinmişdir.
Biz Patriarx Kirillin bu təltif qərarını qətiyyətlə pisləyirik və bunun Rusiya Pravoslav Kilsəsinin tarixi prinsiplərindən böyük bir sapma olduğuna əminik. Patriarxın bu addımı, beynəlxalq arenada mədəni və dini soyqırımlar həyata keçirənlərlə həmrəyliyin sübutudur və biz bunu Erməni Apostol Kilsəsinə qarşı açıq-aşkar düşmənçilik aktı kimi qiymətləndiririk.
Dəhşətlisi odur ki, Azərbaycanın diktatorunun Artsaxdan erməni izlərini silmək üçün atdığı açıq addımlar, onun ən yaxın siyasi müttəfiqi olan birinci xanım və vitse-prezident Mehriban Əliyevanın təltifi ilə dolayısı yolla alqışlanır. Bu, Azərbaycan tərəfindən ermənilərə və xristianlığa qarşı həyata keçirilən mədəni soyqırımın davam edən kampaniyasına səssiz razılıq və dəstəkdən başqa bir şey deyildir.
Aydındır ki, Azərbaycanın hakimiyyəti bölgədə yaratdığı saxta tarixə tək rəqib kimi Erməni Apostol Kilsəsini görür. Mədəniyyətin məhv edilməsində günahkar olan bir siyasətçiyə kilsə təltifi verilməsi, saxtalaşdırılmış başlıqlarla təşkil edilən akademik konfranslar – bütün bunlar Əliyev hakimiyyətinin Erməni Apostol Kilsəsinə qarşı qurduğu hiyləgər planların və sistemli hücumlarının sübutudur.
Bu hücumlar, kilsənin gücünü, şöhrətini və müqəddəs nüfuzunu azaltmağa yönəlib və bu, hətta Rusiya Pravoslav Kilsəsi kimi bir qurumun yüksək səviyyələrinə nüfuz etməklə həyata keçirilmişdir.
Biz öz müqəddəs və apostol kilsəmizə qarşı yönəlmiş bütün strateji hücumlara qarşı mübarizə aparmaq əzmimizi qəti şəkildə bəyan edirik. Erməni Apostol Kilsəsi, Azərbaycan adlı dövlət və mədəniyyətin mövcudluğundan əvvəl yaranmışdır və öz uca missiyasını sarsılmaz inam və sədaqətlə davam etdirəcək.
Biz dini təltiflərin siyasi məqsədlərlə istifadə olunmasını rədd edirik və kilsəmizin şöhrətinə, nüfuzuna və əbədi şahidliyinə yönəlmiş bütün cəhdləri qınayırıq.”
