Ermənistanın iqtisadiyyat naziri Gevorq Papoyan Ermənistanın dövlət borcu ilə bağlı müzakirələrə münasibət bildirib. Papoyan Facebook səhifəsində paylaşdığı videoda mövzuya toxunub.
“Borc, borc, borc… son vaxtlar Ermənistanda çox danışılan bir şey. Axı, Ermənistanın dövlət borcu çoxdur, yoxsa az, artıb, yoxsa azalıb? Ermənistanın dövlət borcu 2017-ci ildə ÜDM-in 59 faizini təşkil edirdi, 2025-ci ildə isə ÜDM-in 49 faizini təşkil edəcək. Başqa sözlə, dövlət borcumuz azalıb, bu da o deməkdir ki, ölkəmizdəki dövlət borcu mütləq rəqəmlərlə artsa da, xidmət etmək daha asan olub və bu, bir yük olaraq dövlətimiz və Ermənistan xalqı üçün azalıb. Sizə bir nümunə verim: “Gəlin iki ailəni təsəvvür edək. Birinin ayda cəmi 200 min dram gəliri var, amma krediti, borcu yoxdur, digərinin isə 100 milyon dolları gəliri və 20 milyon dollar krediti var. Əlbəttə ki, hansı ailə daha yaxşı yaşayır, ikincisi. Buna görə də borcun mütləq miqdarı vacib deyil, vacib olan onun sizin gəlirinizdə hansı hissəsini tutmasıdır və Ermənistanın gəlirində bizim borcumuzun miqdarı azalıb”, – deyə Ermənistan Respublikasının iqtisadiyyat naziri bildirib.
