Rusiya xarici işlər naziri Sergey Lavrov Yerevan və Moskvanın yaxın, müttəfiq, eyni zamanda mürəkkəb münasibətlərə malik olduğunu bildirib.
“Armenpress”in məlumatına görə, Rusiya xarici işlər naziri bunu BRICS nazirlər görüşünün nəticələrindən sonra Nyu-Dehlidə keçirilən mətbuat konfransında deyib. Lavrov Qərbi Ermənistanın MDB və AİB tərəfdaş ölkələri ilə qarşılıqlı faydalı iqtisadi, ticarət və investisiya əlaqələrini kəsmək cəhdlərində günahlandırıb və Ermənistanın Avrasiya İqtisadi Birliyindəki bütün üstünlüklərini itirə biləcəyini vurğulayıb.
O qeyd edib ki, Yerevan və Moskva may ayının sonlarında Qazaxıstanda keçiriləcək AİB sammiti zamanı münasibətləri müzakirə edəcəklər. Rusiya xarici işlər naziri Ermənistan baş nazirinin 28 may tarixində Qazaxıstanda keçirilməsi planlaşdırılan AİB sammitində iştirak etməyəcəyinə təəssüfləndiyini bildirib və bunun “havada asılı qalan məsələləri müzakirə etmək” üçün yaxşı fürsət olduğunu vurğulayıb.
Ermənistanın Baş naziri Nikol Paşinyan daha əvvəl mayın 28-də Qazaxıstanda keçiriləcək AİB sammitində iştirak etməyəcəyini açıqlamışdı. O, Rusiya Prezidenti Vladimir Putin və Qazaxıstan Prezidenti Kasım-Jomart Tokayevə Ermənistandakı seçki kampaniyası səbəbindən sammitdə iştirak edə bilməyəcəyi barədə məlumat verdiyini qeyd etmişdi.
