Rusiya Ermənistandan Ermənistanın Baş naziri Nikol Paşinyanın 28 mayda Astanada keçiriləcək Avrasiya İqtisadi Birliyi rəhbərlərinin zirvə toplantısında iştirak etməyəcəyi barədə rəsmi bildiriş alıb.
“Armenpress”in məlumatına görə, bunu Rusiya Xarici İşlər Nazirliyinin rəsmi nümayəndəsi Mariya Zaxarova brifinq zamanı bildirib.
“Ermənistan tərəfindən Baş nazir Nikol Paşinyanın Avrasiya İqtisadi Birliyi rəhbərlərinin qarşıdan gələn görüşündə iştirak edə bilməyəcəyi barədə rəsmi bildiriş aldıq. Ermənistanı Baş nazirin müavini Mher Qriqoryan təmsil edəcək”, – deyə Zaxarova bildirib və əlavə edib ki, Birliyə üzv dövlətlərin nümayəndələrinin AİB orqanlarının işində iştirak etmədiyi oxşar hallar əvvəllər də baş verib.
Zaxarova bir daha Ermənistan hakimiyyətinin Avropa Birliyinə yaxınlaşmaq üçün yürütdüyü siyasətdən danışıb və vurğulayıb ki, onlar dəfələrlə həm AİB-ə, həm də Aİ-yə eyni vaxtda qoşulmağın mümkün olmadığını bildiriblər. Ermənistanın Baş naziri Nikol Paşinyan daha əvvəl Rusiya Prezidenti Vladimir Putin və Qazaxıstan Prezidenti Kasım-Jomart Tokayevə Ermənistandakı seçki kampaniyası səbəbindən mayın 28-də Qazaxıstanda keçiriləcək AİB iclasında iştirak edə bilməyəcəyi barədə məlumat verdiyini bildirmişdi.
