“Airbus Helicopters” şirkəti və Ermənistan Respublikası altı çoxfunksiyalı H145 vertolyotunun tədarükü haqqında müqavilə bağlayıb.
Sövdələşmə Fransa Prezidenti Emmanuel Makronun Yerevana rəsmi səfəri zamanı qəti şəkildə təsdiqlənib və bu yaxınlarda artıq qüvvəyə minərək Fransa ilə Ermənistan arasında ikitərəfli əlaqələrin möhkəmləndirilməsi yolunda mühüm addım olub.
Bu çoxfunksiyalı vertolyotlar nəqliyyat məqsədləri üçün istifadə olunacaq. Bu, “Airbus Helicopters” ilə Ermənistanın ilk müqaviləsidir və ölkənin vertolyot parkının öz sinfində ən çevik və etibarlı modellərdən biri vasitəsilə müasirləşdirilməsinə təməl qoyur.
“Bu ilkin müqavilə şirkətimizlə Ermənistan arasında dərinləşən tərəfdaşlığın sübutudur. Ölkənin aviasiya imkanlarının inkişafına dəstək olmaqdan qürur duyuruq” – deyə Şərqi Avropa, Mərkəzi Asiya və Qafqaz regionu üzrə direktor, vitse-prezident Lüdovik Buasto qeyd edib.
O, əlavə edib: “Uzunmüddətli və səmərəli əməkdaşlıq gözləyirik və əlaqələrimizi daha da dərinləşdirməyə hazırıq”.
H145 vertolyotları yüksək performansı ilə seçilir, xüsusilə yüksək dağlıq və isti şəraitdə və Ermənistanın mürəkkəb və dağlıq coğrafiyasına tam uyğundur.
Dünyada H145 ailəsinə aid 1800-dən çox vertolyot istismar olunur, onların ümumi uçuş vaxtı 8,5 milyon saatı keçir.
Vertolyot iki “Safran Arriel 2E” mühərriki ilə işləyir, mühərrikin rəqəmsal idarəetmə sisteminə (FADEC) və “Helionix” rəqəmsal avionika (təyyarə elektronikası) sistemlərinə malikdir.
