Cari ilin birinci yarısında Ermənistanda iqtisadi aktivlik göstəricisi 2023-cü ilin analoji dövrünün nəticəsini 10,4 faiz üstələyib. Bu barədə Ermənistan Respublikasının Statistika Komitəsi məlumat yayıb.
2024-cü ilin may ayı ilə müqayisədə iyunda iqtisadi aktivlik 11,3 faiz artıb. İlin ilk altı ayında Ermənistanda sənaye məhsulunun həcmi 2023-cü ilin eyni yarısı ilə müqayisədə 18,2 faiz çox olub və 1 trilyon 408 milyard 107,2 milyon dram təşkil edib. İyun ayında bu, 225 milyard 124,5 milyon dram təşkil edib ki, bu da əvvəlki ilin eyni ayının göstəricisini 1,4 faiz üstələsə də, cari ilin may ayına nisbətən 2,4 faiz azdır.
2024-cü ilin yanvar-iyun aylarında kənd təsərrüfatının ümumi məhsulunun həcmi əvvəlki ilin müvafiq dövrünün göstəricisini 4 faiz üstələyərək 285 milyard 824,9 milyon dram təşkil edib.
2024-cü ilin yanvar-iyun aylarında ticarət dövriyyəsi ötən ilin müvafiq dövrü ilə müqayisədə 22,9 faiz artaraq 2 trilyon 754 milyard 219,3 milyon dram təşkil edib. İyun ayında ticarət dövriyyəsi 515 milyard 33,8 milyon dram təşkil edib ki, bu da cari ilin may ayı ilə müqayisədə 4,3 faiz, ötən ilin iyun ayı ilə müqayisədə isə 16,2 faiz çoxdur.
