Polşanın paytaxtı Varşavada oktyabrın 6-dan 17-dək ATƏT ölkələrində insan hüquqları və fundamental azadlıqlar mövzularına həsr olunmuş konfrans keçirilir.
Bu barədə Beynəlxalq və Müqayisəli Hüquq Mərkəzindən məlumat verilib.
Konfrans zamanı ATƏT ölkələrində demokratiya, insan hüquqları, ədalətli məhkəmə araşdırmaları və Helsinki prinsipləri ilə bağlı məsələlər müzakirə olunur.
Varşava konfransında həmçinin “Beynəlxalq və Müqayisəli Hüquq Mərkəzi”nin rəhbəri Siranuş Sahakyan və təşkilatın üzvü Raffi-Filip Kalfayan iştirak edir.
Siranuş Sahakyan çıxışında Bakıda saxlanılan erməni girovların məsələsinə, bu məsələdə Azərbaycanın ayrı-seçkilik siyasətinə toxunub.
Onun sözlərinə görə, erməni girovları etdikləri hərəkətlərə görə deyil, şəxsiyyətlərinə görə hədəfə alınırlar. Hüquq müdafiəçisi eyni zamanda Azərbaycan nümayəndə heyətinin saxta tezelərinə cavab verib.
“Azərbaycan erməni girovları müstəqil vəkillərdən istifadə etmək hüququndan məhrum edir, məhkəmə prosesləri müstəqil və qərəzsiz deyil və alçaldıcı səhnələşdirilmiş mərasimlərə bənzəyir.
Halbuki, Azərbaycan hökuməti bu forumda erməni məhbusların bütün hüquqlardan, o cümlədən vəkillərlə əlaqə yaratmaq imkanından faydalandıqlarını bildirir.
Amma Bakı mənim – girovların Avropa İnsan Hüquqları Məhkəməsi tərəfindən səlahiyyət verilmiş nümayəndəsi olaraq – əsirlərlə görüşmək tələbinə rədd cavabı verib.
5 illik icazəli görüşlərin sayı 0-dır. Əgər “hüquqların müdafiəsi” belədirsə, onda Azərbaycanda ədalətli məhkəmə araşdırması və digər bütün hüquqların vəziyyətini təsəvvür edə bilərik” – deyə Sahakyan bildirib.
Tədbirdə həmçinin Ermənistan tərəfdən “ Məlumatlı vətəndaş”, “Sərhədsiz Hüquqların Müdafiəsi” və “Bərabər Hüquqlar üçün Təhsil Mərkəzi” QHT-lərinin, eləcə də “Amerika Erməni Məsələləri Komitəsi”nin (ANCA) və “Avropada ədalət və demokratiya uğrunda Erməni Federasiyası”nın (EAFJD) nümayəndələri iştirak ediblər.
Konfransdan sonra Ermənistanın vətəndaş cəmiyyəti nümayəndələri ATƏT dövlətlərinin nümayəndə heyətləri ilə ayrıca görüşlər keçirərək Azərbaycanda saxlanılan erməni əsirlərin məsələsini yenidən qaldırıb, Bakıda keçirilən qeyri-qanuni və saxta məhkəmələr barədə məlumat veriblər.
