Amnesty International, Azərbaycanın “Meydan TV”-si ilə əlaqədar həbs olunmuş jurnalistlərin azadlığa buraxılması üçün kampaniya başlatdı.
Təşkilat ictimaiyyəti Azərbaycan prezidenti İlham Əliyevə müraciət etməyə və jurnalistlərin sərbəst buraxılmasını tələb etməyə çağırır.
Təşkilatın hazırladığı müraciət nümunəsində qeyd olunur ki, bu işlə əlaqədar 12 nəfər həbs edilib və onlardan ən azı 3-nün təcili tibbi yardıma ehtiyacı var.
Müraciətdə deyilir:
“Jurnalistlərin cinayət təqibi siyasi səbəblərə əsaslanır və hökumətin müstəqil media orqanlarına qarşı davamlı təzyiqlərinin bir hissəsidir.
Onların özbaşına həbsi və təqibinin dayandırılması üçün dərhal tədbir görülməsini tələb edirik.
Ən azı üç nəfərin sağlamlıq vəziyyətinin pisləşməsi və onlara lazımi tibbi yardımın göstərilməməsi ilə bağlı dərin narahatlıq ifadə edirik.
12 jurnalistin saxlanıldığı şərait – o cümlədən hüceyrələrdə həddindən artıq sıxlıq, cinsi təcavüz təhdidləri və psixoloji təzyiqlər – işgəncə və ya digər qəddar, qeyri-insani və alçaldıcı rəftar hesab edilə bilər və bunlar, Azərbaycanın insan hüquqları öhdəliklərinin pozulmasıdır”.
Təşkilat xüsusi vurğulayır ki, təcili tibbi yardıma ehtiyacı olanlar arasında “Meydan TV”nin baş redaktoru Aynur Elgünəş, jurnalistlər Şəmşad Ağa və Ülviyyə Əli (Quliyeva) də var.
6 dekabr 2024-cü ildə “Meydan TV” ilə əlaqədar saytın Azərbaycan nümayəndəliyinin rəhbəri Aynur Elgünəş, jurnalistlər Ramin Dekon (Cəbrayılzadə), Aysel Umudova, Aytac Təpdig, Xəyalə Ağayeva, Natiq Cavadlı və vətəndaş cəmiyyəti nümayəndəsi Ülvi Tahirov həbs edilib.
Daha sonra eyni iş çərçivəsində “Argument.az” saytının baş redaktoru Şəmşad Ağa, jurnalistlər Nurlan Libren, Fatimə Mövləmlı, Ülviyyə Əli (Quliyeva) və fotoqraf Əhməd Muxtar da saxlanılıb.
Hamısı əsasən qaçaqmalçılıq da daxil olmaqla bir neçə maddə ilə ittiham olunur.
Həbsdə olan jurnalistlərin heç biri ittihamları qəbul etmir və iddia edir ki, onlar jurnalist fəaliyyətinə görə hakimiyyətin siyasi əmri ilə həbs ediliblər.
Mətn factor.am-ə məxsusdur.
