Davit Xudatyan “Şimal–Cənub” avtomobil yolunun tikintisinin gedişi ilə bağlı açıqlama verib. O, bildirib ki, Gümrüyə gedən hissədə tikinti işləri tam başa çatdırılıb.
Yaxın günlərdə həmin hissədə işıqlandırma şəbəkəsinin qoşulması da tamamlanacaq və yol tam istismara veriləcək.
Nazirin sözlərinə görə, Cənub hissədə intensiv tikinti işləri aparılır. Xüsusilə Kacaran–Aqarak hissəsində işlərin icra səviyyəsi hazırda 40 faizdən çoxdur.
Bu layihə hazırda Ermənistanda ən iri tikinti hesab olunur. 2025-ci il ərzində burada gündə orta hesabla 65 milyon dramlıq iş görülüb, təxminən 700 işçi və 240-dan çox texnika cəlb olunub.
Xudatyan qeyd edib ki, həmin hissədə iki tuneldən birinin qazılması artıq tamamlanıb, digərində isə işlərin böyük hissəsi görülüb.
Onlardan biri son 30 ildə Ermənistanda sıfırdan qazılmış ən uzun tunel hesab olunur.
Bu ərazidə 15 körpünün tikintisi planlaşdırılır və hazırda onlardan 14-ü üzrə işlər aparılır.
Kacaran tunelinin tikintisi ilə bağlı tender artıq yekunlaşıb və yaxın vaxtlarda müqavilə imzalanacaq. Tunelin əsas tikinti işlərinə isə 2026-cı ildə başlanması nəzərdə tutulur.
