Vəziyyəti danışıqlarla həll etmək mümkün deyildi, çünki danışıqlar ABŞ-ın İrana hücumunu legitimləşdirmək üçün formal xarakter daşıyırdı.
Bu barədə jurnalistə müsahibəsində “Ermənistan-İran Strateji Əməkdaşlığın İnkişafı Mərkəzi”nin təsisçisi Purya Hüseyni bildirib.
“İran öz qırmızı xətlərini dəqiq müəyyən etmişdi, lakin onlar İranı tərksilah etmək, İranın öz nüvə proqramını kənara qoymasını istəyirdilər.
Bu, İranın təhlükəsizliyi ilə bağlıdır və İranın öz təhlükəsizliyini güzəştə getməyə haqqı yox idi. Danışıqlardan müharibəni legitimləşdirmək və ABŞ silahlı qüvvələrinin regionda yerləşdirilməsi üçün istifadə edirdilər. Onlar kifayət qədər mövqe tutduqdan sonra hücumlara başladılar”.
Buna cavab olaraq İran İsrailə, həmçinin regiondakı Amerika bazalarına – Bəhreyndən Səudiyyə Ərəbistanına, Küveytə, Qətərədək zərbələr endirməyə başlayıb.
Bunlar ərazisində Amerika bazaları olan ölkələrdir. İran müharibə olarsa, bunun bütün regionun müharibəsi olacağını və ABŞ-a hərbi baza verən bütün ölkələri qanuni hədəf saydığını vəd etmişdi”- deyə o bildirib.
ABŞ Prezidentinin bu dəfəki zərbələrin daha genişmiqyaslı olacağı barədə bəyanatına toxunan Hüseyni deyib: “Miqyaslar böyük olacaq. ABŞ qısa əməliyyatla nəticə əldə etmək istəyir.
Birinci mərhələdə İranın yüksək vəzifəli məmurlarını hədəfə almağa çalışırdılar, lakin dəqiqələr öncə İranın XİN rəhbəri bu hədəflərin uğursuzluğa uğradığını, 1-2 komandir itkisi ola biləcəyini, yüksək vəzifəli məmurların isə təhlükəsiz yerdə olduğunu, sağ-salamat olduğunu bildirdi.
İranın dini rəhbərinin öldürüldüyü xəbərlərinin yalan olduğu rəsmən açıqlandı. Bu, onların ilk hədəflərinə çatmadığını göstərir.
Digər hədəfləri İran silahlarını tamamilə məhv etmək, ondan sonra nüvə obyektlərini, hərbi obyektləri, həmçinin polis obyektlərini məhv etməkdir ki, sonradan öz agentləri vasitəsilə İranın birliyini sarsıda bilsinlər, hökumət binalarına qarşı təxribatlar törətməyə, onları ələ keçirməyə cəhd etsinlər.
Tramp bu haqda açıq danışdı ki, hava qüvvələrinin zərbələri dayandıqdan sonra İran xalqı küçəyə çıxmalı, hökumət binalarını ələ keçirməlidir.
İrana qarşı 12 günlük müharibədə uğursuzluğa düçar oldular. Bundan sonra iqtisadi narazılıqlardan istifadə edərək daxili təxribatlarla məqsədlərinə çatmağa çalışdılar, bu da uğursuz oldu, indi hər ikisini birlikdə sınamaq qərarına gəliblər.
İndi güc strukturlarını hədəfə almaq istəyirlər ki, kütlə küçəyə çıxsın, hökumət binalarını ələ keçirsin. Onların məqsədi İranda nail ola bilmədikləri hakimiyyət dəyişikliyidir” – deyə ekspert vurğulayıb və əlavə edib ki, İran sürətli cavablar verdi və İranın müqavimət göstərməyə hazır olduğunu nümayiş etdirdi.
Hüseyni qeyd edib ki, bu dəfə İran daha hazırlıqlı idi, müharibə ola biləcəyini gözləyirdi: “Hətta bütün vacib vəzifələri tutanların əvəz ediciləri təyin olunub, yəni kimisə hədəfə alsalar da, sistem dağılmayacaq, əvəz edicilər işlərini davam etdirəcək”.
İranda qızların ibtidai məktəbinə edilən və onlarla ölümə səbəb olan hücuma toxunan ekspert deyib ki, onlar üçün heç bir qırmızı xətt yoxdur.
“İsrail Fələstində minlərlə uşağı öldürüb və indi İranda uşaq məktəblərini hədəfə almaq onlar üçün qırmızı xətt deyil.
Bu, onların hədəflərinin təkcə hərbi obyektlər və məmurlar olmadığını göstərir. Bu, beynəlxalq hüququn pozulması və hərbi cinayətdir və beynəlxalq məhkəmələrdə cavab verməlidirlər”.
İranın bu genişmiqyaslı hücumdan az itki ilə çıxa biləcəyi və tam məğlub vəziyyətinə düşüb-düşməyəcəyi sualına o belə cavab verib.”
“Heç kim nəticəni proqnozlaşdıra bilməz, bu, İranın ABŞ və İsrailə ağrılı cavablar verə bilməsindən asılıdır. Bu halda onlar müharibəni tez dayandırmağa çalışacaqlar, çünki qurbanlar çoxaldıqca, ABŞ-da ictimaiyyət hökumətə təzyiq göstərəcək və onlar ölkə daxilində problem yaşayacaqlar.
Onlar sürətli əməliyyat gözləyirdilər, Venesuelada etdikləri kimi, tez nəticə əldə edib qalib kimi çıxacaqdılar, amma indi İran elə etməlidir ki, onlar üçün vəziyyət idarəolunmaz olsun. Əgər müharibə uzansa, bu, onların maraqlarına uyğun deyil və onlar oyunun qaydalarını dəyişəcəklər” – deyə Hüseyni bildirib.
