Ermənistanın Xarici işlər naziri Ararat Mirzoyan Azərbaycanla sülh prosesinin niyə təminatçılara ehtiyacı olmadığını izah edib.
“Ermənistan” telekanalına müsahibəsində nazir sülhün təmin olunduğuna, müqavilənin ilkin imzalandığına və bununla tərəflərin qarşılıqlı olaraq Alma-Ata protokoluna uyğun siyasi müstəqilliyi, ərazi bütövlüyünü və sərhədlərin toxunulmazlığını tanıdığına əmin olduğunu bildirib.
Nazir müxalifətin narahatlıqlarını şişirdilmiş adlandırıb və ümumilikdə daha böyük nailiyyətləri təsəvvür etməyin çətin olduğunu düşünür.
Ermənistan hakimiyyətinin niyə təminatçıları cəlb etmək istəmədiyi sualına cavab olaraq Mirzoyan hər hansı müqavilənin əsas təminatçısının qarşılıqlı mənfəət olduğunu və müqavilənin tərəflər üçün sərfəli olduğu müddətcə qüvvədə qalacağını bildirib.
Onun sözlərinə görə, təminatçılar adətən öz mənafelərini güdürlər ki, bu da həmişə yaxşı nəticəyə gətirib çıxarmır. Mənfi nümunə kimi o, Rusiyanın Ukraynanın təhlükəsizliyinin əsas təminatçılarından biri olması barədə bəyanatları göstərib.
XİN-in bu gün elan etdiyi TRIPP haqqında çərçivə sazişinin imzalanmasını şərh edən Mirzoyan sənədin distant qaydada – Rubio Vaşinqtonda, Mirzoyan isə Yerevanda olmaqla imzalandığını qeyd edib və xatırladıb ki, saziş ilkin olaraq dövlət katibinin Ermənistanın paytaxtına qısa səfəri zamanı imzalanmışdı.
Bu, ötən il avqustun 8-də Vaşinqtonda başlayan prosesin davamı idi, lakin onun bitməsi deyil. Mirzoyana görə, bu gün imzalanmış sənəd ratifikasiya olunmalı, sonra birgə şirkətin nizamnaməsini, səhmdarlar arasında sazişi razılaşdırmaq lazımdır, şirkət qurulduqdan sonra isə o, dəmir yolunun tikintisi üçün tender elan edəcək və ya bəlkə də əvvəlcə elektrik enerjisi təchizatı hissəsi həyata keçiriləcək.
Ümumilikdə, Mirzoyanın sözlərinə görə, bu o deməkdir ki, Ermənistan dünyanın yeni logistik yollar axtardığı bir dövrdə nəqliyyat dalana çıxmaqdan Şərqlə Qərb arasında körpüyə çevrilir. “Balaca ölkəmiz mühüm qovşağa, sülhün kəsişməsinə çevrilir” – deyə Mirzoyan bildirib.
Müxaliflərin mövqelərin daha yaxşı ola biləcəyi barədə arqumentlərinə cavab olaraq nazir onları “biabırçı və dəhşətli iqtisadi sövdələşmələr” etməkdə günahlandıraraq cavab verib.
Mirzoyan təfərrüatlara girmək istəməyərək “Tramp marşrutu” ilə bağlı sazişin iqtisadi baxımdan Ermənistan üçün çox sərfəli olduğunu, daha yaxşı şərtlər haqqında söhbətlərin ya utopik, ya da pis niyyətli nağıllar olduğunu bildirib.
Onun fikrincə, layihə Ermənistan üçün Azərbaycan və Türkiyənin infrastrukturunu açmağa imkan verəcək və əksinə, eyni zamanda üçüncü ölkələri üçüncü ölkələrlə, məsələn, Portuqaliyanı Qazaxıstanla Ermənistanın ərazisi vasitəsilə birləşdirəcək.
Bu, qiymətlərə təsir edəcək və erməni istehsalçılarına yeni imkanlar yaradacaq.
Təhlükəsizlik baxımından Ermənistan mühüm qovşağa çevrilir və bununla da təhlükəsizlik təminatları əldə edir, – deyə Mirzoyan bildirib. Onun sözlərinə görə, TRIPP yalnız sülhün bərqərar olması nəticəsində mümkün olub və onu daha da möhkəmləndirir.
