Avropakomissar Marta Kos mandatı dövründə Avropa Birliyinə üzv olacaq ölkələri qeyd edib
AB genişlənməsi üzrə avropakomissar Avropa İttifaqının genişlənməsinin onun mandatı dövründə baş verəcəyinə əmin olduğunu bildirib, lakin yeni üzv ölkələrin dəqiq sayı hələ müəyyən edilməyib.
Bu barədə o, Qdanskda Ukraynanın bərpası məsələləri üzrə konfrans zamanı baş tutan müzakirədə bildirib, “Yevropeyskaya Pravda” xəbər verir.
Kosun sözlərinə görə, 2029-cu ildə başa çatacaq fəaliyyəti dövründə Çernoqoriyanın üzvlüyü haqqında əminliklə danışa bilər.
“Deyə bilərəm ki, Çernoqoriya mənim mandatım dövründə növbəti üzv olacaq. Və əgər İslandiya üzvlük məsələsinə qayıtsa və avqustda keçiriləcək referendumda vətəndaşlar bunu dəstəkləsə, mən buna da şad olaram” – deyə o, bildirib.
Avropakomissar həmçinin Albaniyanın əhəmiyyətli irəliləyişini qeyd edərək, ölkənin artıq danışıq fəsillərini bağlamağa başladığını vurğulayıb.
“Beləliklə, hazırda genişlənmə prosesi son 15 ildə olduğundan daha sürətlə irəliləyir” – deyə Kos bildirib.
Eyni zamanda o, danışıqların sürətlənməsinin Ukraynada davam edən genişmiqyaslı müharibə ilə əlaqəli olduğunu vurğulayıb.
“Etiraf etməliyik ki, məhz Ukrayna müharibəsi bu prosesin sürətlənməsinə səbəb olub” – deyə avropakomissar qeyd edib.
