Ermənistan Respublikasının İtaliyadakı səfirliyinin Facebook səhifəsində qeyd edilib ki, Ermənistan hökumətinin Ermənistan müəssisələrinin Avropa bazarlarına çıxışını təşviq etmək proqramı çərçivəsində 20 iyul tarixində Venesiyadakı Ermənistan Respublikasının Fəxri Konsulluğunda Ermənistan Respublikasının iqtisadiyyat nazirinin müavini Anuşik Avetyanın, Ermənistan Respublikasının İtaliyadakı səfiri Vladimir Karapetyanın, “İnvestisiya Dəstək Mərkəzi” Fondunun direktoru Qohar Abajyanın, CONFAPI Venesiya İş Adamları Birliyinin prezidenti Marko Zekinellinin, baş direktor Nikola Zanonun və İdarə Heyətinin üzvlərinin iştirakı ilə işgüzar görüş keçirilib.
Görüş zamanı Ermənistan-İtaliya iqtisadi əməkdaşlığının genişləndirilməsi perspektivləri müzakirə edilib, müxtəlif sektorlarda Ermənistan məhsullarının Avropa bazarlarında təşviqi, eləcə də iki ölkə arasında ticarət-iqtisadi əlaqələrin gücləndirilməsi və yeni biznes imkanlarının yaradılması ilə bağlı fikir və təcrübə mübadiləsi aparılıb.
Daha sonra nümayəndə heyəti Venesiya prefekti Darko Pellos tərəfindən qəbul edilib. Görüşdə Ermənistan və İtaliya arasında iqtisadi və institusional əməkdaşlığın daha da inkişaf etdirilməsinin vacibliyi vurğulanıb.
