ER Baş nazirinin xanımı təhsilini Çində davam etdirəcək
“İm Kaylı” (“Mənim addımım”) Fondunun icraçı direktoru, Ermənistanın Baş nazirinin xanımı Anna Hakopyan sentyabr ayında Çinə yola düşəcək və Pekin Normal Universitetində (“Beijing Normal University”) “Çin fəlsəfəsi” üzrə ikiillik magistr proqramında təhsil alacaq.
Fondun verdiyi məlumata görə, proqram ingilis dilində tədris olunur və Çin fəlsəfi məktəblərinin, etik və siyasi nəzəriyyələrin hərtərəfli öyrənilməsini əhatə edir.
“Çində səfərdə olarkən və bu güclü ölkədə insanların necə yaşadığını görərkən düşündüm ki, bizim bir çox problemlərimizin kökündə məhz təhsil dayanır” – deyə Anna Hakopyan “Təhsil almaq dəbdədir” hərəkatının bir neçə görüşündə qeyd edib.
Məhz bu təəssüratlardan təsirlənərək, Anna Hakopyan ötən il “Təhsil almaq dəbdədir” hərəkatını başladıb. Bu təşəbbüs artıq 8000-ə yaxın iştirakçını əhatə edir və Ermənistanın 19 icmasında görüşlər təşkil olunub.
Hərəkatın məqsədi fasiləsiz təhsili (life-long learning) ölkədə yaymaq və bu ideyanı ən ucqar kəndlərdə yaşayan insanlara çatdırmaqdır.
Akademik həyatdan illərlə uzaq qaldıqdan sonra, yüksək təhsilini Çində davam etdirən Anna Hakopyan eyni zamanda bir nümunə rolunu da oynayır. Onun fikrincə, insan daim qlobal təcrübəyə açıq olmalı və bu təcrübəni lokallaşdıraraq ümumi ictimai inkişafa xidmət etməlidir.
Pekində Anna Hakopyan Çin fəlsəfəsinin əsas istiqamətlərini – Konfutsiçiliyi, Daoizmi, Çin siyasi fəlsəfəsini, Çin etikası və digər sahələri öyrənəcək.
Fevral ayında qəbul mərhələləri başladıqda, o cümlədən müsahibə mərhələsində professor-müəllim heyəti artıq ilk müsahibədən Anna Hakopyanın təhsilə olan istəyi, cavabları və məqsədlərindən çox təsirləniblər.
Onların xoş sözləri və yüksək qiymətləri xanım Hakopyanı daha da məsuliyyətli yanaşmağa ruhlandırıb – təhsilini ən yaxşı şəkildə davam etdirməyə və onu ümumi məqsədə xidmət etdirməyə.
Mənbəyə görə, Anna Akopyanın bu təşəbbüsü Ermənistan–Çin uzunmüddətli dostluğunu daha da möhkəmləndirir. Çin və Ermənistan qədim sivilizasiyalardır və dərin fəlsəfi və mədəni oxşarlıqlara malikdirlər.
Anna Hakopyanın Çində magistr təhsili eyni zamanda qarşılıqlı hörmətə, mədəni təcrübə mübadiləsinə və əməkdaşlığın möhkəmləndirilməsinə töhfə verən bir dialoq platforması rolunu oynaya bilər.
Qeyd olunur ki, “Təhsil almaq dəbdədir” hərəkatının ilhamverici nəticələrindən biri də Marine Hakopyanın hekayəsidir. O, hərəkatın görüşlərində iştirak edib və Anna Hakopyanın özünü inkişaf və təhsil çağırışından ilhamlanaraq, buraxdığı təhsili davam etdirmək qərarına gəlib və Ermənistanda universitetə qəbul olunmaq istəyir.
Onun arzusu “İbtidai pedaqogika və metodika” ixtisası üzrə təhsil almaqdır.
“İm Kaylı” fondu bu ilhamverici və nümunəvi hekayəyə biganə qala bilməyib və Marine Akopyanı məqsədinə çatmaq yolunda dəstəkləyir.
Onun iradə və hazırlığını nəzərə alaraq, fond təhsil xərclərini qarşılayacaq, imtahanlara hazırlıq və qəbul prosesində ona yardım edəcək.
Qeyd olunur ki, Marine Hakopyan Aprel döyüşlərində şəhid olan Jora Yesayanın anasıdır. Fondun verdiyi məlumata görə, Anna Hakopyanın təhsil yolu və bu kimi hekayələrdən ilhamlanan “İm Kaylı” Fondu yaxın vaxtlarda “Təhsil almaq dəbdədir” hərəkatına dəstək məqsədilə yeni proqram elan edəcəkdir.
