İsraillə İran arasında bir neçə gün davam edən qarşıdurma zamanı erməni biznes qurumları çətinliklə üzləşib.
Bu barədə Ermənistan Respublikasının iqtisadiyyat naziri Gevorq Papoyan Parlamentin İqtisadi məsələlər üzrə daimi komissiyasının növbədənkənar iclasında bildirib.
“İranın Bəndər-Abbas limanında, yollarda yüklər gecikir. İxracla bağlı problemlərimiz var. İrandan və ya İran ərazisindən keçən idxalçılarımız hazırda bir çox problemlərlə üzləşirlər.
Ümid edirik ki, qarşıdurma bitəcək və biz əvvəlki kimi dost İran ərazisindən sərbəst ticarət edə biləcəyik” – deyə Papoyan bildirib.
İyunun 13-nə keçən gecə İsrail İranın hərbi və nüvə obyektlərinə hücum edib, həmçinin ölkənin ali hərbi rəhbərliyinin nümayəndələrini və nüvə fiziklərini məhv etmək üçün xüsusi əməliyyatlar keçirib.
İran və İsrail silahlı qüvvələri çoxlu sayda itki və yaralananlarla nəticələnən zərbələr mübadiləsi aparır.
