BMTİP-in Ermənistandakı nümayəndəsi 2026-2030-cu illər üçün ümumi büdcəsi 100 milyon dollar olan yeni əməkdaşlıq proqramına başlayır. “Armenpress”in məlumatına görə, bu barədə BMTİP-in Ermənistandakı rezident nümayəndəsi Natiya Natsvlişvili BMTİP-in fəaliyyətinin 30-cu ildönümünə həsr olunmuş təntənəli tədbirdə bildirib. Onun sözlərinə görə, yeni proqram Ermənistan hökuməti və maraqlı tərəflərlə geniş və inklüziv məsləhətləşmələr nəticəsində hazırlanıb və hər kəsə, xüsusən də ən həssas qruplara fayda verən inkişafı təmin etməyə yönəlib.
Natsvlişvili qeyd edib ki, “BMTİP Ermənistanda 2026-2030-cu illər üçün ümumi büdcəsi 100 milyon dollar olan yeni proqrama başlayır. Buraya sosial-iqtisadi inkişaf, demokratik idarəetmə, iqtisadi artım, iqlim dəyişikliyinə qarşı mübarizə, gender bərabərliyi və innovasiya daxildir”. O, vurğulayıb ki, son üç onillikdə BMTİP Ermənistanı münaqişələrdən və təbii fəlakətlərdən tutmuş bərpa və davamlı inkişafa qədər müxtəlif inkişaf mərhələlərində müşayiət edib.
BMTİP-in Ermənistandakı rezident nümayəndəsi vurğulayıb ki, “bu müddət ərzində 1 milyondan çox insan BMTİP-in dəstəyindən faydalanıb və Ermənistanın inkişafına 500 milyon dollardan çox investisiya qoyulub”.
Natsvlişvili proqramın uğurunun etimad, ortaq dəyərlər və milli məsuliyyət üzərində qurulmuş tərəfdaşlığa əsaslandığını qeyd edərək, Ermənistan hökumətinin demokratik təsisatların gücləndirilməsində, sosial inteqrasiyanın və iqlim siyasətinin təşviqində rolunu vurğulayıb.
O, həmçinin Ermənistanın 2026-cı ildə BMTİP-in İcra Şurasının üzvü olacağını açıqlayıb ki, bu da onun fikrincə, beynəlxalq ictimaiyyətin Ermənistanın qlobal inkişaf əməkdaşlığındakı konstruktiv roluna inamının sübutudur.
Tədbirin sonunda Natiya Natsvlişvili Ermənistan hökumətinə, donorlara, tərəfdaşlara, vətəndaş cəmiyyətinə və BMTİP komandasına təşəkkür edərək, təşkilatın qarşıdakı illərdə Ermənistan xalqına dəstəyini davam etdirməyə tam sadiq olduğunu vurğulayıb.
