Ermənistan hökuməti Azərbaycanda qanunsuz saxlanılan erməni əsirlərin qaytarılması üçün hər gün çalışır və bütün danışıqlarda bu məsələ müzakirə olunur. “Armenpress”in məlumatına görə, bunu Ermənistan Respublikasının baş naziri Nikol Paşinyan Parlamentdə hökumət üzvləri ilə sual-cavab zamanı “Ermənistan” fraksiyasının katibi Artsvik Minasyanın sualına toxunaraq deyib.
“İlk növbədə, hökumətimizin Beynəlxalq Ədalət Məhkəməsində məsələ qaldırdığı ən son nümunəni verim. Düşünürəm ki, məhkəmə çox vacib bir qeyd edib. Təbii ki, o, irqi ayrı-seçkilik ifadəsini görmədiyi üçün hərbi əsirlərin, girovların və ya digər saxlanılan şəxslərin dərhal azad edilməsini tələb etməyib, digər tərəfdən isə beynəlxalq hüquqa əsasən, hərbi əməliyyatlar zamanı əsir düşənlərin vətənə qaytarılmalı olduğunu bildirib. Qalan məsələlərə gəlincə, biz gündəlik işi diplomatiya yolu ilə görürük, məsələ bütün danışıqlar yolu ilə müzakirə olunur, tədbirlər görülür”, – deyə Paşinyan bildirib.
