İran Ermənistan hökumətinin təklif etdiyi “Sülh kəsişməsi” layihəsini alqışlayır. Bu barədə İranın xarici işlər naziri Hüseyn Əmir-Abdollahyan dekabrın 27-də Yerevanda Ermənistanın xarici işlər naziri Ararat Mirzoyanla birgə mətbuat konfransı zamanı bildirib.
“İran Cənubi Qafqazda sabit sülhün bərqərar olmasını və Şimal-Cənub tranzit marşrutunun işə salınmasını dəstəkləyir. İran da Ermənistanın baş nazirinin təklif etdiyi və “Sülh kəsişməsi” kimi təqdim edilən layihəni alqışlayır. Biz Şimal-Cənub tranzit marşrutunun inkişafı üçün ardıcıl olmağa hazırıq”, – deyə İranın xarici işlər naziri bildirib.
Hüseyn Əmir-Abdollahyan əlavə edib ki, İran xarici qüvvələrin müdaxiləsi olmadan bu sülh və təhlükəsizliyi təmin etmək istəyir. “Yalnız regional qarantların sayəsində həmin sülh və təhlükəsizlik təmin edilə bilər”.
