Ermənistanda “meymunçiçəyi” halı qeydə alınmayıb: Səhiyyə Nazirliyi

Ermənistanda meymunçiçəyi xəstəliyinə yoluxma halı qeydə alınmayıb və daha da yayılma riski aşağı hesab olunur. “Armenpress”in məlumatına görə, bu barədə ER Səhiyyə Nazirliyi məlumat yayıb.

Avqustun 14-də Ümumdünya Səhiyyə Təşkilatı (ÜST) son iki ildə ikinci dəfə əhalinin sağlamlığı sahəsində beynəlxalq əhəmiyyətli fövqəladə vəziyyət elan edib.

Bu, Konqoda və bəzi Afrika ölkələrində “meymunçiçəyi”nə yoluxma hallarının artması, həmçinin cinsi yolla ötürülən virusun yeni ştammının yayılması ilə əlaqədardır.

Nazirlik “meymun çiçəyinin” nə olduğunu təqdim edib

Bu, əsasən Mərkəzi və Qərbi Afrikanın bəzi ölkələrində qeydə alınan virus mənşəli xəstəlikdir.Virusun gizli müddəti 5-21 gündür. Simptomlara atəş, şiddətli baş ağrısı, genişlənmiş limfa düyünləri, bel ağrısı, əzələ ağrıları və nəzərəçarpacaq zəiflik daxildir.

Qızdırma başlayandan 1-3 gün sonra üzdə başlayan və sonra bədənin müxtəlif hissələrinə yayılan səpgilər görünür. Hazırda bu xəstəliyə qarşı ÜST tərəfindən təsdiq edilmiş iki vaksin istifadə olunur.

Nazirlik vurğulayır ki, bunun qarşısını almaq üçün insanlar məlumatlandırılmalı, əl gigiyenası qaydalarına əməl edilməli, səpgili insanlarla təmasdan çəkinməli, Afrikaya səfər etdikdən sonra və ya təmasdan sonra dəri səpgiləri və digər əlamətlər yaranarsa, dərhal infeksionistə müraciət edilməlidir.