Qırğızıstanın tikinti şirkəti “Meadi” MMC paytaxtı Bişkekdə Azərbaycan-Qırğızıstan Dostluq Parkının tikintisinə görə Azərbaycanın hələ də 3 milyon dollardan çox borcu olduğunu iddia edərək, Azərbaycan Xarici İşlər Nazirliyini məhkəməyə verib, OC Media xəbər verir.
Park və ona bitişik Heydər Əliyev Məktəbi 2019-cu ildə layihələndirilib və Azərbaycan Xarici İşlər Nazirliyi hər iki layihəyə 8 milyon dollardan çox vəsait ayırıb. Tikinti 2022-ci ildə başa çatdırılıb və təməlqoyma mərasimində Azərbaycan prezidenti İlham Əliyev qırğızıstanlı həmkarı Sadir Japarovla birlikdə iştirak edib. Lakin 3 ildən sonra “Meadi” MMC Azərbaycan hökumətinin layihənin pulunu tam ödəmədiyini bəyan edib.
Şirkət iddia ərizəsində qeyd edib ki, pulu almaq üçün dəfələrlə Azərbaycan Xarici İşlər Nazirliyinə müraciət etsə də, nəticəsi olmayıb. Şirkətin iddiasında Azərbaycan Maliyyə Nazirliyinin də adı çəkilir, lakin o, müqavilə ilə heç bir əlaqəsi olmadığını iddia edir. Azərbaycan Xarici İşlər Nazirliyi də öz növbəsində bildirib ki, iddia müddəti bitdiyi üçün iddia geri götürülməlidir.
