ER Baş naziri Nikol Paşinyan Yerevanın Şengavit inzibati rayonunun sakinləri ilə görüşdə keçmiş hakimiyyət nümayəndələri, dövlət büdcəsinin artımı və korrupsiyaya qarşı mübarizə haqqında danışıb.
Alınan məlumata görə, Baş nazir qeyd edib ki, hakimiyyət əvvəllər mənimsənilmiş vəsaitlərin bir hissəsini geri qaytarmağa nail olub.
“Biz artıq oğurlanmış milyardlarla gəliri geri qaytarmışıq” – deyə Paşinyan bəyan edib.
Onun sözlərinə görə, inqilabdan sonra Ermənistanın dövlət büdcəsinə əlavə 6,6 milyard dollar daxil olub. Paşinyan həmçinin qeyd edib ki, təkcə Zəngəzur mis-molibden kombinatı 2018-2025-ci illərdə əvvəlki səkkiz illə müqayisədə 300 milyard dram çox vergi ödəyib.
Baş nazirin sözlərinə görə, toplanmış vəsaitlər müxtəlif proqramlar vasitəsilə vətəndaşlara qaytarılıb.
“1,4 trilyon dram məbləğində pul Ermənistan vətəndaşlarına qaytarmışıq”– deyə o, qeyd edib, nümunə olaraq pensiyaların artırılmasını, gəlir vergisinin qaytarılması proqramlarını, çoxuşaqlı ailələrə dəstəyi, habelə təhsil və ordunun maliyyələşdirilməsinin artımını göstərib.
Paşinyanın sözlərinə görə, Ermənistanda hazırda 700 min dramadək maaş alan hərbçilər və müəllimlər var, ölkədə 300 məktəb və 500 uşaq bağçası tikilir.
O, həmçinin qeyd edib ki, son illərdə icmalarda təxminən bir milyard dollarlıq investisiyalar həyata keçirilib.
Eyni zamanda Baş nazir etiraf edib ki, proqramlar gözlənildiyi sürətlə həyata keçirilməyib.
“Müqavimət böyük olub. Bilirsiniz, 6,6 milyard dollar itirmək asandırmı? Biz mafiyaya qarşı mübarizə aparırıq, əziz xalq, mafiyaya qarşı” – deyə Paşinyan bəyan edib.
