“Ermənistan Avrasiya İqtisadi İttifaqı (Aİİ) çərçivəsində öz öhdəliklərini yerinə yetirir”.
Bunu Rusiya xarici işlər nazirinin müavini Aleksandr Pankin deyib.
O bildirib ki, Ermənistan Aİİ üzvlüyünə böyük maraq göstərməyə davam edir. Yerevanın İttifaq daxilində öz öhdəlikləri var və onları yerinə yetirir.
“Ermənistan bütün öhdəliklərini yerinə yetirməklə çox böyük fayda əldə edir. Bunu təkcə yüksək istehsal templərində deyil, həm də xarici ticarət dövriyyəsi və Yerevana əmək miqrantlarının köçürülməsindəki sıçrayışlarda görmək mümkündür. Amma digər tərəfdən, biz görürük ki, Yerevan Avropa İttifaqının orbitinə şirnikləndirilir.
Biz Avropa İttifaqı ilə assosiativ üzvlük və ya digər qarşılıqlı fəaliyyət formalarının hansı şərtlərlə bağlandığını bilmirik. Biz Yerevanın daxili işlərinə qarışmırıq. Amma təəssüf ki, adətən Aİ tərəfdaşları öz şərtlərini tətbiq etməyə və istədikləri ölkələri digər assosiasiyalardan ayırmağa meyllidirlər. Bəli, Ermənistanın İttifaqın üzvü olan ölkələrlə ümumi sərhədləri yoxdur, lakin tarixi və iqtisadi kontekstdə çox yaxındırlar”, – deyə Pankin vurğulayıb.
